Colegio di Supervision Financiero Aruba (CAft) a publica su conseho riba e presupuesto den concepto di Aruba pa 2026. Aunke e panorama presupuestario na prome bista ta mustra positivo, CAft ta haci un serie di observacionnan fundamental cu ta lanta pregunta tocante e sostenibilidad di e maneho financiero a largo plaso.

E presupuesto pa 2026 ta mustra un surplus di AWG 159 miyon, ekivalente na 2,1 porciento di e producto interno bruto (GDP). Pa e añanan 2027 te cu 2030 tambe ta spera un surplus anual di por lo menos un porciento di e GDP. Cu esaki, Aruba ta cumpli cu e rekisitonan formal di e Ordenansa Nacional di Supervision Financiero Aruba (LAft). Asina mes, e huicio di CAft no ta sin preocupacion.

Un di e advertencianan mas importante ta encera e aumento structural di e gastonan. Desde 2023, e gastonan di gobierno a aumenta cu aproximadamente AWG 250 miyon, principalmente door di aumento di salario den sector publico y gastonan extra na compensacion adicional di pensioen (‘pensioentoeslagen’). Si e nivel di gasto aki continua sin cambio, deficitnan den futuro lo ta inevitabel, segun CAft. E presupuesto multianual actual ta mantene ekibocadamente e idea cu hopi di e puestonan di gasto lo keda nominalmente mescos—un suposicion cu ta mina seriamente e realismo di e presupuesto.

E gastonan di interes ta forma un otro punto doloroso structural. Na 2026, aproximadamente 16 cen di cada florin ricibi ta bay na pagonan di interes. Ta spera cu e presion aki lo keda stabil te cu 2030, y como tal ta limita e flexibilidad presupuestario di e pais. Aruba lo tin cu paga AWG 648 miyon na debe, pero solamente un parti limita di esaki lo ser paga via e surplus presupuestario; e resto lo ser refinancia.

Un oportunidad pa alivia e presion aki, segun CAft, ta sinta den e surplusnan di Algemene Ziektekostenverzekering (AZV) y di Sociale Verzekeringsbank (SVb), cu hunto ta representa un suma di mas o menos AWG 447 miyon. CAft ta insisti pa uza e fondonan aki—si ta legalmente hustifica—pa reduccion di debe.

Riba tereno di inversion, ainda falta claridad. Aruba a inclui un nivel di inversion di AWG 50 miyon, pero un agenda di inversion multianual bon substancia ta ausente. E fondo di inversion anuncia tambe ta lanta pregunta: kico ta e structura di gobernacion, con lo supervis’é, y cual metanan di maneho concreto ta persigui cuné?

Finalmente, CAft ta señala ineficiencia den areglonan social. E ‘reparatietoeslag’ pa pensionadonan actualmente ta ser otorga sin un prueba di entrada (‘inkomenstoets’), loke no ta den liña cu ley. Segun calculacionnan anterior, un prueba di entrada dirigi por spaar miyones anualmente.

E conseho di CAft ta cla: Aruba mester uza e espacio financiero actual pa atende cu e problemanan structural, y no pa gaña su mes cu cifranan positivo. Solamente e ora ey e panorama presupuestario positivo di 2026 por forma e base pa un salud financiero duradero.