Cu Brazil recientemente uniendo na OPEC+, e panorama petrolero global ta cambiando, lantando preguntanan tocante cua paisnan na Sur America y Caribe tin influencia den e Organisacion di Paisnan Exportador di Petroleo (OPEC). A pesar di e inclusion di Brazil den OPEC+, Venezuela ta keda e unico miembro completo di OPEC for di Sur America, un status cu e tin desde e fundacion di e organisacion na 1960. Mientras cu otro paisnan, manera Ecuador, a bandona OPEC, y Brazil ta participando den un capacidad limita, Venezuela ta sigui ta e representante mas fuerte di Sur America den e cartel petrolero global.

E rol di Venezuela den OPEC historicamente tabata significante. Como un miembro fundador, el a forma e politicanan di OPEC y ta keda un di e paisnan cu e reservanan di petroleo mas grandi na mundo. A pesar di su luchanan economico y politico, Venezuela ta sigui depende hopi riba exportacion di petroleo, cu ta representa mas di 90% di su ganashinan total di exportacion. Contrario na e participacion no-obligatorio di Brazil den OPEC+, Venezuela ta suheto na e cuotanan y regulacionnan di produccion di OPEC, loke ta nifica cu su politicanan petrolero ta mas alinea cu e interesnan di productornan grandi manera Saudi Arabia y Emiratonan Arabe Uni.

E decision di Brazil pa uni OPEC+ ta notable, pero e no ta otorga e pais e mesun nivel di influencia cu Venezuela. OPEC+ ta inclui tanto miembronan di OPEC como 10 otro nacion productor di petroleo grandi, incluyendo Rusia. E participacion di Brazil ta permiti pa e participa den discusionnan di mercado petrolero, pero sin e obligacion di sigui e limitenan estricto di produccion di OPEC. E miembresia flexibel aki ta duna Brazil beneficionan economico sin restriccionnan obligatorio, contrario na Venezuela, cu mester cumpli cu e medidanan di control di produccion di OPEC. Ecuador, un otro ex-miembro di OPEC, a bandona e organisacion na 2020, declarando cu su strategianan di produccion di petroleo tabata rekeri mas independencia for di e regulacionnan di e cartel.

Den e region di Caribe, no tin miembronan di OPEC, aunke nacionnan rico den petroleo manera Trinidad y Tobago tin nivelnan di produccion significante. Sinembargo, e economianan mas chikito aki no a busca miembresia di OPEC debi na e cuotanan estricto di e organisacion y compromisonan di politica global. Venezuela ta keda e productor di petroleo dominante den e region, a pesar di retonan manera sancionnan di Merca, infrastructura den deterioro, y turbulencia politico interno. Su miembresia di OPEC ta dun’e un asiento na mesa den discusionnan di energia global, un privilegio cu ningun otro pais Sur Americano tin actualmente.

Mientras cu e mercado petrolero ta evoluciona, e rol continuo di Venezuela den OPEC lo wordo observa di cerca, specialmente mientras cu paisnan manera Brazil ta busca pa expande nan influencia global a traves di OPEC+. Mientras cu e participacion di Brazil ta fortalece su posicionamento economico, Venezuela ta keda e unico bos Sur Americano den e proceso di toma di decision di OPEC. Cu transicionnan di energia global y preocupacionnan di clima aumentando, e rol di nacionnan productor di petroleo manera Venezuela y Brazil lo bira ainda mas critico den forma e futuro di e industria.