Tanto na Oranjestad como na San Nicolas, edificionan cu ta keda bashi pa hopi tempo ta un problema creciente. E bashi aki ta contribui na un apariencia bandona di e cayanan grandi y ta stroba e dinamismo economico y social. Hopi doño, hopi biaha sin debe di hipoteca, ta pidi prijsnan di huur exageradamente halto, locual ta pone huurdonan potencial hala atras. Esaki ta lanta e pregunta si un medida di maneho, manera un “vacancy tax”, por mehora e situacion.

Un “vacancy tax” ta un belasting riba edificionan bashi cu ta stimula doñonan pa huur nan propiedadnan of pa usa nan di un manera util. E instrumento aki a demostra di ta exitoso rond mundo den ciudadnan manera Vancouver, San Francisco y Paris, unda e ta yuda reduci bashi y ta duna bida nobo na areanan urbano. Na Aruba, un belasting similar por incentiva doñonan pa usa prijsnan di huur mas realistico, pa nan propiedadnan wordo uza y e apariencia di e cayanan grandi mehora.

E problema di bashi na Aruba ta bay mas leu cu consecuencianan economico; e tin un impacto psicologico tambe. E apariencia bandona di e cayanan grandi ta descurasha bishitantenan y turistanan, locual ta causa un spiral negativo pa tiendanan y negoshinan rond. Un belasting riba edificionan bashi no solamente por stimula doñonan financieramente pa haci nan propiedadnan disponibel, pero tambe por contribui na e recuperacion di e dinamica y atractivo di e centronan di ciudad.

Criticonan por argumenta cu un “vacancy tax” ta un peso extra pa doñonan, specialmente den un economia cu ya ta enfrentando retonan. Sinembargo, un maneho di belasting bon diseña por crea incentivonan en bes di castigo. Por ehempel, doñonan cu ta huur nan propiedad na prijsnan rasonabel of cu ta contribui na proyectonan comunitario, por ricibi beneficionan fiscal. Esaki ta ofrece un situacion “win-win”: mas entrada di huur pa doñonan, menos gasto door di belasting, y un apariencia mas vibrante di e cayanan grandi.

Finalmente, introduci un “vacancy tax” ta un escogencia strategico cu ta bay mas leu cu ganashi economico. E ta tocante restructura e panorama urbano di Aruba, crea oportunidadnan pa empresarionan, y restaura e bida social y economico den e cayanan grandi. Pa doñonan, e ta simpel: un tiki entrada for di un propiedad gehuur ta semper miho cu perde placa na un belasting riba bashi.

Cu e enfoke corecto y un colaboracion amplio entre gobierno, doñonan y empresarionan, un “vacancy tax” por ta un instrumento poderoso pa combati e deterioro di e cayanan grandi di Aruba y duna bida nobo na e ciudadnan. Ta tempo pa tuma accion y duna e edificionan bashi aki un proposito nobo.