E ex-presidente di Uruguay, José “Pepe” Mujica, a fayece na edad di 89 aña. Mujica, kende a dirigi e pais di 2010 te 2015, a bira conoci mundialmente como “e presidente mas pober di mundo” pa su estilo di bida simpel, su rechaso di materialismo y su honestidad remarcabel.  

E noticia a wordo confirma pa e presidente actual Yamandú Orsi, kende a gradici Mujica riba medionan social pa su dedicacion incondicional na e pueblo. Mujica tabata sufri di cancer di esofago, aunke e causa exacto di morto ainda no a wordo publica.

José Mujica a nace na Montevideo y a lanta den un famia di clase media. Su viahe politico a cuminsa den e Partido Nacional di centro-derecho, pero a radicalisa den e añanan sesenta ora cu el a yuda funda e movimento di guerilla di izquierda Tupamaros. Durante e periodo ey, el a wordo encarcela varios biaha, tortura y teni den isolacion pa añanan largo. El a hasta scapa dos biaha for di prison, incluyendo via un tunnel cu mas di 100 compañero preso.  

Despues di su liberacion na 1985, ora cu Uruguay a bolbe na democracia, Mujica a cuminsa un carera politico den parlamento. Na 2005 el a bira minister y cinco aña despues presidente. El a goberna cu pragmatismo y a keda fiel na su principionan: simplicidad, husticia social y transparencia.

Como presidente, Mujica no a biba den e palacio presidencial, pero a keda hunto cu su esposa, Lucía Topolansky, den nan cas simpel net pafo di Montevideo. El a core den un Volkswagen Kever bieu di 1987 y a duna gran parti di su salario na caridad. Aunke el a rechasa e etiket “presidente mas pober,” el a bira un simbolo mundial di modestia.  

Bou di su presidencia, e economia a crece cu un promedio di 5.4% pa aña, pobresa a baha y Uruguay a bira un pionero riba tereno social. El a legalisa aborto, matrimonio homosexual y e benta regula di marihuana. Sinembargo, su politica no tabata sin critica: su opositornan a señala e debe estatal creciente y e falta di reformanan den enseñansa.  

Despues di su presidencia, Mujica a keda activo como senador y orador internacional. Na 2020 el a retira oficialmente for di politica, aunke el a keda un compas moral pa hopi hende. Su sucesor y heredero politico Yamandú Orsi a wordo eligi presidente na final di 2024.  

Mujica a acepta morto como algo natural. Den su ultimo entrevistanan, el a papia abiertamente tocante su enfermedad y e fin di bida, sin drama of miedo. El a laga un impresion profundo atras – no solamente na Uruguay, sino mundialmente – como un lider cu a demostra cu berdadero grandesa hopi biaha ta sconde den simplicidad.