Proteha e Turistanan, Proteha e Guianan

Mientras cu negociacionnan ta continua rond di e problemanan relata na turismo di UTV y ATV na Aruba, tin un oportunidad pa trece dilanti algo cu hopi biaha ta keda lubida den e debate: e derechonan y e condicionnan laboral di e personanan cu ta core e vehiculonan aki tur dia.

E discusion no por keda limita unicamente na turista, companianan, permisonan, areanan protehi of control di autoridad. E guianan turistico tambe ta parti esencial di e cuadro aki. Y nan prome derecho mester ta simpel: e derecho di por traha den un ambiente sigur.

Prome: Siguridad Absoluto

Den pasado a registra accidentenan sumamente serio y fatalidadnan cu e tipo di vehiculonan aki. E echo ey so mester ta suficiente motibo pa haci siguridad e punto di salida di tur negociacion. Turismo no por ta exitoso si hende ta perde nan bida mientras nan ta participando aden.

Reglanan mester ta transparente, enforsa consistentemente y valido pa tur hende sin excepcion:

• Mantencion debido di e vehiculonan;
• Evaluacion estricto di e rutanan permiti;
• Limite di velocidad y di pasahero;
• Ekipo di proteccion obligatorio;
• Entrenamento debido y certificacion profesional pa e guianan.

E principio mester ta cla: ganashi comercial no por bay prome cu bida y siguridad di hende.

Di Dos: E Prijs Fisico di e Trabou

Tin un aspecto di siguridad cu ta haya hopi menos atencion: e desgaste fisico riba e curpa di e guianan mes.

Un guia ta pasa oranan largo tur dia coriendo riba tereno bruto, absorbiendo golpi, trancamento y vibracion constante den henter su curpa. Nan ta haci esaki dia tras dia, siman tras siman y aña tras aña:

• Cuanto guia ta sufri di dolor cronico di lomba, nek, schouder of articulacion?
• Cuanto ta sigui traha pasobra nan no por permiti nan mes pa para?
• Cuanto lesion ta keda categorisa simplemente como “parti di e trabou”?

Aruba no mester warda te ora trahadornan keda invalido pa cuminsa haci e preguntanan aki. E negociacionnan mester inclui un investigacion independiente riba e peligernan di salubridad laboral mara na e industria aki.

Di Tres: Miho Condicionnan Laboral

E aspecto economico no por keda afo. Un guia turistico no mester depende primordialmente di propina (tip) pa por biba un bida desente. Propina ta boluntario; salario mester ta un garantia:

• Salario husto y contractnan formal di trabou;
• Oranan di trabou rasonabel y tempo debido pa sosega;
• Seguro medico y compensacion corecto den caso di accident na trabou.

Kisas a yega e momento pa Aruba considera seriamente un Convenio Colectivo di Trabou (CAO) pa e sector aki. Un CAO por stipula condicionnan minimo igual pa henter e ramo, evitando cu companianan ta competi cu otro a costo di salario y proteccion di nan trahadornan.

Esaki no ta un atake contra e sector di aventura; ta un esfuerso pa hacie sostenibel. Si Aruba kier e tipo di turismo aki, e hendenan cu ta haci e aventura posibel merece proteccion tambe. Siguridad prome, salud di dos, condicionnan laboral husto di tres. Ganashi financiero ta bini despues.

Ora e motornan cende y e turistanan subi, e guia no mester ta esun cu ta core e peliger di mas grandi mientras e ta ricibi e proteccion di mas poco.