Arubianonan gusta bisa cu nos ta hende caluroso, amabel, y uni. Pero tras di e palabranan confortabel ey ta sconde un berdad mas duro: ta mucho mas facil pa rebaha un hende aki cu pa lant’e. Critica, redashi, y duda ta flui rapidamente. Un simpel “bon haci” of un momento di aplauso? Hopi mas dificil pa haya.

Dikon esaki ta Pasa? Ego y Inseguridad

Dikon esey ta asina? Un parti ta bin di biba den un sociedad chikito cu egonan grandi. Riba un isla chikito caminda tur hende conoce (of ta kere cu nan conoce) otro, exito hopi biaha no ta wordo mira como algo pa celebra — sino como un menasa. Un hende cu ta tribi di destaca, di inova, of di papia ta hopi biaha ricibi prome cu sospecho of un comentario di banda manera, “Laga nos mira con leu nan ta yega.”

Pero bou di e reaccion ey ta sconde algo mas profundo: inseguridad y jaloezie. Mira un hende logra loke bo tabata tin mucho miedo pa purba por ta incomodo. En bes di asumi e incomodidad ey, hopi ta scoge e caminda mas facil — critica. Duna elogio ta rekeri confiansa. E ta tuma humildad pa bisa, “Locual bo ta haciendo ta impresionante.”

Un Hesitacion Cultural cu Ta Perhudica Nos

Tin tambe un hesitacion cultural aki — un especie di bloke mental. Nos hopi biaha tin miedo pa duna otro demasiado credito. Manera si gaba un hende di algun manera ta kita algo di nos mes. E tipo di pensamento ey ta stroba nos tur. Un comunidad cu no ta sostene su mesun hendenan ta fomenta desconfiansa y stancamento.

Wak nos hobennan, empresarionan, of artistanan cu ta purba haci un diferencia. En bes di stimula, hopi biaha nan ta wordo encontra cu rumornan, duda, of silencio. Solamente ora nan tin exito den exterior nos ta clamanan cu orguyo — manera si reconocemento di pafo ta locual finalmente ta hacinan digno. Pero dikon nos ta warda pa hende di pafo valida loke nos mester a mira for di prome?

Un Yamada pa un Cambio di Mentalidad

Si Aruba berdaderamente kier avansa, nos tin mester di un cambio den mentalidad: menos enfoke riba fayonan, mas atencion na esfuerso. Nos no mester ta di acuerdo, pero mustra respet pa iniciativa no mester ta un gesto raro.

Construi hende ta tuma esfuerso, pasenshi, y curashi. Un sociedad cu ta scoge critica riba sosten lo no crea nunca e tipo di orguyo, confiansa, of progreso cu e ta pretende di kier.

Kisas ta tempo pa nos siña aplaudi esnan cu ta purba — en bes di fluister tocante esnan cu nos ta spera lo faya.