Vuelo di Flydubai Ta Desvia pa Arabia Saudita 

Un vuelo di rutina di e aerolinea Flydubai for di Dubai pa Tel Aviv a transforma diaranson den un incidente grave di siguridad di aviacion, despues cu un confrontacion violento a rementa paden di e cabina di piloto (cockpit), obligando e Boeing 737-8 MAX pa haci un aterisahe di emergencia na Arabia Saudita.

Vuelo FZ1073 tabata biahando for di Aeropuerto Internacional di Dubai pa Aeropuerto Ben Gurion na Tel Aviv cu alrededor di 170 pa 180 persona abordo. Flydubai a confirma cu e avion a experencia un “incidente riba ruta”, pero cu el a baha bon na Aeropuerto di Tabuk y cu tur pasahero ta sano y salvo.

Loke a pasa den e cabina ta awor e punto central di investigacion. Segun oficialnan di Israel y varios fuente di noticia, un pelea fisico a tuma luga entre e dos pilotonan mientras e avion tabata den laira. Raportnan ta indica cu un di e pilotonan a wordo hinca cu cuchiu. Tur dos piloto a resulta herida y a wordo traslada pa hospital despues di baha na tera.

E gravedad di e situacion a keda refleha den e datonan di radar y señalnan di emergencia:

• E avion tabata bulando na un haltura di rond di 34,000 pia ora el a baha diripiente pa bao di 17,000 pia den apenas un minuut;
• E tripulacion a transmiti e codigo di emergencia internacional 7700 y poco despues e codigo 7500, cu ta e señal oficial pa interferencia ilegal of posibel secuestro di avion (hijacking);
• Forsa Aereo di Israel a lansa avionnan di combate (fighter jets) di biaha pa motibo di e incertidumbre.

E avion a logra baha na Prince Sultan bin Abdulaziz International Airport na Tabuk rond di 9:45 a.m. ora local. Raportnan preliminar ta menciona cu miembronan di tripulacion, pasaheronan y posiblemente otro pilotonan cu tabata biaha como pasahero a interveni pa domina e situacion y stabilisa e vuelo.

Autoridadnan di Israel ta investigando si e atake tabata un intento terorista. Prome Minister Benjamin Netanyahu a declara publicamente cu tin sospecho cu un di e pilotonan a purba basha e avion abou deliberadamente. Sinembargo, e motibo exacto no ta confirma ainda; otro teorianan ta inclui un intento di suicidio of un disputa interno severo.

E destinacion y e fecha ta haci e caso sumamente delicado, tumando luga apenas algun dia prome cu e di tres aniversario di e atakenan di 7 di october 2023.

Pa expertonan di aviacion, e retonan grandi ta keda pa splica con un arma a drenta un cabina cera, con e avion a perde haltura asina rapido y con serca e vuelo FZ1073 tabata di bira un tragedia aereo fatal.