Na Aruba tin biaha ta parce comosifuera un parti di e poblacion no ta mentalmente fuerte of no ta bon educa ora ta trata politica. Tin hende cu ta disfruta di mira gobierno faya, no pasobra nan realmente kier mehoracion, sino puramente pa preferencia politico. E tipo di mentalidad aki sinembargo no ta trece progreso—e ta trece caos, stagnacion y finalmente consecuencia pa nos tur.

Rivalidad Politico vs. Interesnan Nacional

Division politico ta normal den un democracia. Tur hende tin derecho di tin un opinion riba maneho, liderazgo y gobernacion. Pero kico ta pasa ora hende concientemente ta spera cu un gobierno faya, solamente pasobra nan no a vota pa e partido ey? Esaki ta nifica cu nan no ta pensa riba futuro di e pais, sino solamente riba venganza politico.

Un gobierno cu ta faya ta nifica menos empleo, mas pobresa, atraso economico y un empeoracion di servicionan publico manera salubridad y enseñansa. Si un coalicion faya, esaki ta hiba na instabilidad, incertidumbre y eleccionnan nobo cu ta costa e pais tempo y placa. Dicon nos lo celebra esey?

Ken Ta Carga e Consecuencianan?

Ora un gobierno faya, no ta e politiconan ta esnan cu ta carga e consecuencianan mas pisa. Nan tin nan salario, nan conexionnan y nan futuro sigura. E ciudadano comun ta esun cu ta sufri—esnan cu ta depende di un bon maneho pa sobrevivi den un mundo cu ya caba ta caro y compleho.

Prijsnan mas halto, incertidumbre economico y instabilidad politico ta afecta nos tur, sin importa preferencia politico. Dicon nos lo kier pa nos lidernan faya si nos ta esnan cu finalmente ta paga e prijs?

Educacion y Conscientisacion como Solucion

Hopi hende ta pensa cu vota ta e unico manera pa eherce influencia politico, pero democracia berdadero ta rekeri mas cu solamente un voto. Ta crucial pa sigui gobiernonan criticamente sin ta destructivo, y no acepta tur loke lidernan of partidonan politico ta bisa sin mas. Discusionnan mester wordo hiba basa riba hecho en bes di rumor y propaganda, specialmente awor cu hopi media ta bou influencia di interes politico y no semper ta duna informacion obhetivo. Ademas, cooperacion ta esencial—no solamente dentro di un partido, pero como sociedad—pa busca solucionnan cu ta hiba e pais padilanti. Politica no mester ta un wega, sino un decision serio y consciente pa futuro di Aruba.

Tempo pa Pensa pa Dilanti

E mundo ya caba ta caro y dificil suficiente. Aruba no por permiti su mes di causa crisis economico y politico pa puro ignorancia y odio contra cierto partidonan politico. Si un gobierno faya, anto nos ta faya como nacion.

En bes di spera riba fracaso, nos mester spera riba mehoracion. Diferencianan di opinion politico ta normal, pero laga nos no laga nan crece bira un forsa destructivo cu ta pusha nos pais atras. Ta tempo pa un cambio di mentalidad, tempo pa un Aruba mas consciente y inteligente.