Colombia, un tempo elogia pa su enfoke progresivo riba migracion, awor ta enfrentando un crisis humanitario den e curason di su sistema di asilo. Segun un raport nobo, mas cu 29,500 persona—mayoria Venezolano—actualmente ta para den un limbo legal, sperando pa nan peticionnan di asilo ser procesa. Mientras nan ta spera, nan no por traha legalmente, nan ta ser nenga acceso completo na servicionan publico, y hopi biaha nan ta enfrenta discriminacion y explotacion.

Desde 2017, e cantidad di peticion di asilo na Colombia a subi drasticamente, aumentando di algun shen pa mas cu 10,000 pa aña. Sin embargo, e sistema diseña pa procesa e peticionnan aki no a crece na e mesun ritmo. Na 2024, Colombia a otorga status di refugiado na solamente 118 persona—un cifra minusculo compara cu e miles cu ta sperando.¹ Cu un retraso (‘backlog’) cu awor ta extende pa mas cu tres aña, e solicitantenan ta perdiendo speransa.

E situacion ta specialmente severo pa migrantenan Venezolano, cu ta representa e mayoria di esnan pega den e sistema. Hopi a hui di e crisis social y politico continuo di Venezuela, solamente pa haya nan mes atrapa den un trampa burocratico lento na otro banda di frontera.

E Ministerio di Asuntonan Exterior di Colombia a rechasa e criticanan, acusando hopi solicitante di abusa di e sistema di asilo como un ‘shortcut’ pa status legal. Oficialnan ta argumenta cu un cantidad significativo ta migrante economico en bes di berdadero solicitante di asilo. Gruponan di sociedad civil, sin embargo, ta rechasa e narativa aki fuertemente, señalando cu Colombia a firma acuerdonan internacional manera e Declaracion di Cartagena, cu ta pidi pa proteccion mas amplio den tempo di desplasamento masal y crisis.

Defensornan di derechonan humano ta argumenta cu e sistema mes ta deficiente—cu falta di fondo, falta di personal y no transparente. Nan ta describi e proceso di asilo como innecesariamente dificil y diseña pa cansa e solicitantenan. “E ta manera un wega di video traha pa bo entrega,” un defensor di refugiadonan di e Servicio Hesuita pa Refugiado a bisa.

Intentonan pa regularisa migrantenan via otro rutanan legal tambe a fracasa. Un programa di Status di Proteccion Temporal (TPS) introduci na 2021 a duna cobertura limita y desde e tempo ey a expira pa mayoria adulto. Un visa nobo lansa na 2024 ta dificil pa obtene, rekiriendo documentonan cu hopi Venezolano no tin, manera paspoort valido y prueba di antecedente penal di nan pais di origen.

Pa individuonan vulnerabel—muhe, mucha, personanan LGBTQ+ y ancianonan—e retraso por ta specialmente devastador. Un señora Venezolano di 89 aña recientemente mester a demanda gobierno Colombiano djis pa move su caso padilanti, citando su edad y salud como factornan urgente.

Mientras tanto, financiamento internacional ta secando. E UNHCR a adverti cu Colombia awor ta un di e programanan di refugiado cu mas falta di fondo na mundo. Cu 300,000 migrante cu mester di documentacion legal e aña aki so, ta spera cu solamente un tercer parti lo ricibi’e debi na limitacionnan di presupuesto.

Experto y activistanan ta pidiendo pa un reforma urgente: publica maneho cla pa asilo, permiti solicitantenan traha legalmente mientras nan ta warda, extende programanan di proteccion existente, y aumenta e fondo y personal di e sistema. Sin intervencion, nan ta adverti, e crisis di asilo di Colombia lo empeora, pushando miles di persona mas profundo den pobresa y vulnerabilidad.

Loke un dia tabata un modelo di solidaridad regional, awor ta core riesgo di bira un storia di advertencia di negligencia institucional y oportunidadnan perdi.