AYERA mainta Parlamento a tene un reunion publico pa trata cambio ley pa regla entrada di personanan cu no ta den servicio di e sistema hudicial, pa atende cu supervision y control di camaranan di siguridad instala na varios sitio riba e isla.

E peticion p’e reunion aki a wordo haci pa Minister di Husticia Rocco Tjon dia 21 di mei ultimo y e peticion a drenta na Parlamento dia 27 di mei y el a wordo poni riba kalender di Parlamento pa ser trata ayera mainta. Faltando algun dia pa inicio di otro aña parlamentario nobo, cu ta otro siman, caminda miembronan di e Conseho Legislativo ta bisti mas “deftig” cu nan por pa ricibi Su Excelencia Gobernador Alfonso Boekhoudt, e reunion ayera mainta no a conoce mucho argumento “deftig.”

Manera t’e custumber p’algun tempo caba, e discusion riba e ley aki a bira un confrontacion politico y cu proceso electoral 2025 den porta, ta mas cu claro cu practicamente tur disertacion a conoce su parti politico, riba un asunto cu realmente no a rekeri mucho argumento pa tuma un decision. Hecho ta cu KPA pa falta di suficiente personal, lo no kier mira oficialnan di e cuerpo bay atende cu e sistema cu lo bira realidad dentro di algun dia, caminda ta bolbe perde polis cu tin cu subi caya pa percura cu trankilidad ta reina den comunidad. Un biaha mas tin cu conclui cu varios Parlamentario a firma pa nan hiba palabra pero nan aporte na un discusion relevante y efectivo, simplemente no a existi y e biaha aki por a nota cantidad di ripiticion di opinion riba e asunto di un centro pa atende cu camaranan di siguridad cu lo wordo instala.

Kisas e aspecto cu mas a haci falta durante di e reunion aki y cu ningun momento a bin dilanti mes, tabata kico ta a maneho di gobierno y di e Minister di Husticia, na momento cu e centro di vigilancia aki cuminsa opera oficialmente. No a discuti ningun momento riba fondonan pa mantencion di e aparatonan aki, di control di henter e sistema aki ya cu ta trata di aparatonan sofistica pero tambe hopi delicado caminda ta rekeri pa Minister di Husticia den nomber di su gobierno, aloca fondo necesario pa atende cu mantencion di e aparatonan aki. Gobiernonan awor y di pasado, semper a dicidi cu mantencion di su propiedadnan, nunca tabata algo primordial riba nan agenda di gobernacion, ya cu semper a mira cu fondo pa mantencion di propiedadnan, por ser uza pa otro metanan caminda e interes politico a bira mas importante cu mantencion di edificionan.

Na e momentonan aki, caminda a trata e cambio di ley pa permiti personanan for di e cadena hudicial pa atende cu e sistema di camara, tin cu menciona cu ta mesun ministerio di husticia aki, pa casi ocho aña caba, no a aloca fondo pa mantencion di KIA y e luga ta cayendo den otro sin cu tin perspectiva cu esaki lo bay cambia a corto plaso. Varios warda di polis a conoce problemanan pa hopi tempo cu “schimmel” caminda hasta mester a move e central di Oranjestad pa un otro caminda ya cu salud di varios oficial di polis tabata coriendo peliger.

Centro di Oranjestad ta den decadencia ya cu gobierno cu den pasado a “revitalisa” e centro aki, no ta atende cu mantencion di loke a inverti miles di florin aden pa haci un diferencia p’e centro. Esaki ta un tipo di “kapitaal vernieteging” manera Minister Ursell Arends a yega di considera esaki, caminda den caya principal, Gilbert Francois Croes, e mesun gobierno actual a dicidi di yena henter un sistema di fontein cu santo ya cu no kier a pone fondo disponibel p’esaki sigui funciona.

Asina por mustra riba diferente situacionnan serio caminda gobierno a neglisha por completo mantencion di propiedadnan publico, caminda e proyecto di RWZI na Bubali y rond di hotelnan, t’esun mas serio. P’e motibo aki tin cu duna beneficio di duda con henter e proyecto di instalacion di camara di siguridad lo bay funciona y pa cuanto tempo esaki lo ta efectivo.