Mientras e Crisis di Siguridad Regional Ta Bira Mas Severo
Republica Dominicana a manda personal militar adicional pa su frontera cu Haiti mientras tensionnan di siguridad ta sigui aumenta despues di e desaparicion di cuater solda Salvadoreño cu tabata forma parti di un mision internacional pa combati gangnan arma den e pais bisiña Caribense.
Por lo menos shete vehiculo militar a yega den e municipio fronteriso di Jimaní, den e provincia zuid di Independencia, segun medionan local a publica riba 24 di october. E convoy tabata inclui trucknan militar y unidadnan cu personal arma. Autoridadnan Dominicano ta aumentando vigilancia mientras nan ta monitoria e desaroyonan na e otro banda di e frontera.
E movecion aki ta bini mientras e crisis na Haiti ta menasa di bira un problema regional mas grandi, cu forsanan internacional pasando trabou pa frena e bandanan criminal y e buskeda di e militarnan Salvadoreño ainda andando.
Cuater solda desapareci ta lanta tension
E cuater miembronan militar Salvadoreño a disparce dia 18 di october despues di un atake arma cerca di Port-au-Prince. Nan tabata traha pa e Gang Suppression Force (GSF), un mision di siguridad internacional cu ta yuda polis stabilisa Haiti.
El Salvador a manda personal adicional pa yuda den e buskeda, mientras Presidente Nayib Bukele a lansa un advertencia fuerte na e cabesantenan di gang. E desaparicion aki a haci e situacion ainda mas tenso, mirando cu e bandanan criminal ta controla partinan grandi di e capital Haitiano.
Republica Dominicana ta comparti un frontera di casi 390 kilometer cu Haiti y a spierta repetidamente cu un instabilidad prolonga por tin consecuencianan pisa pa migracion, comercio y siguridad.
Mas di 10.000 solda na e frontera
Minister di Presidencia Dominicano, José Ignacio Paliza, a declara e siman aki cu ya caba tin mas di 10.000 militar desplega cant’i e frontera. E refuerso na Jimaní ta bin suma na e presencia cu tabatin caba.
Ministerio di Defensa Dominicano a confirma cu alto mando militar y di inteligencia a reuni pa evalua e situacion. Nan a conclui cu medidanan extraordinario, manera cera e frontera completamente, no ta necesario ainda. P’esey e trafico comercial y pasonan normal lo sigui habri, pero bao di bista hopi mas skerpi.
Un mision internacional bao presion
E crisis ta wordo complica pa motibo di falta di recurso y instabilidad politico na Haiti mes, unda eleccionnan programa pa 13 di december ta keda den duda. Nacionnan Uni a raporta miles di morto y herido e aña aki pa via di violencia di gang, banda di secuestro y desamparo masivo di famianan.
Pa Republica Dominicana, e reto grandi ta con pa proteha su teritorio y mantene calma sin kibra e bida comercial y diario na e frontera, mientras e menasa di su bisiña ta sigui bira mas grandi.






0 Comments