Presidente Donald Trump ta spera di firma un orden ehecutivo trempan dialuna pa reclasifica marihuana bou di ley federal, un paso cu por re-forma e industria di cannabis di Merca y mercadonan financiero. E noticia a pone accionnan relaciona cu cannabis subi diabierna segun cu inversionistanan a reacciona riba loke por ta e cambio mas significativo den maneho federal di droga den decadanan.
Actualmente, marihuana ta clasifica como un droga di ‘Schedule I’ (Lista I)—un categoria reserva pa substancianan manera heroina y LSD, considera di no tin uzo medico acepta y un potencial halto pa abuso. E orden spera di Trump lo reclasific’e como un droga di ‘Schedule III’ (Lista III), banda di substancianan manera steroidenan anabolico y cierto pildonan pa dolor cu receta.
Kico Reclasificacion Ta Nifica? Si marihuana wordo reclasifica pa ‘Schedule III’, esaki no lo legalisa marihuana federalmente, pero e lo tin implicacionnan grandi pa e industria di cannabis. E cambio mas grandi lo ta den con negoshinan di marihuana ta wordo cobra impuesto.
Bou di reglanan di ‘Schedule I’, companianan di cannabis no por deduci gastonan tipico di negoshi manera huur, payroll (pago di trahado), of mercadeo. Esaki ta haci rentabilidad dificil—hasta den estadonan unda cannabis ta completamente legal. Reclasifica marihuana lo permiti e companianan aki wordo cobra impuesto manera cualkier otro negoshi legal, mehorando perspectivanan financiero y encurashando inversion nobo.
Tambe e lo habri porta pa banconan y institucionnan financiero traha cu companianan di cannabis, un paso actualmente restringi bou di ley federal. Acceso legal na sistema bancario lo yuda reduci e naturalesa di uzo di placa cash di e industria, cual pa hopi tempo a hacie vulnerabel pa ladronicia y retonan di cumplimento.
Subida den Mercado di Accion E mercado a responde lihe na e noticia. Accionnan di cannabis a subi drasticamente:
- Tilray Brands a subi mas cu 44%.
- Canopy Growth a bula cu 52%.
- Innovative Industrial Properties, un REIT grandi enfoca riba cannabis, a gana casi 9%.
- E Amplify Seymour Cannabis ETF (CNBS) tabatin su mihor dia di negoshi, subiendo mas cu 54%.
E subida dramatico aki ta refleha optimismo di inversionistanan cu flexibilisacion federal lo impulsa crecemento a largo plaso y rentabilidad den e sector di cannabis.
Kico Ta Sigui? E orden ehecutivo lo cuminsa e proceso, pero e no ta automatico. E Administracion di Cumplimento di Droga (DEA) mester revisa y aproba e reclasificacion. Analistanan ta spera cu e proceso aki por wordo completa pa verano di 2026.
Mientras tanto, Corte Supremo tambe ta considerando si pa tuma un caso cu ta desafia e prohibicion federal di cannabis, loke por añadi mas presion pa cambio.
Aunke defensornan di e industria ta bisa cu esaki ta un paso grandi pa dilanti, hopi tambe ta mir’e solamente como un victoria parcial. Reclasificacion no ta legalisa marihuana na nivel nacional, ni tampoco e ta atende cu recordnan criminal di pasado of asuntonan di ekidad social liga na cumplimento di ley di droga. Sinembargo, e ta señala un cambio pa un asercamiento mas basa riba ciencia y faborabel pa negoshi pa loke ta maneho di cannabis.
Manera un abogado di cannabis a pon’e, “Esaki ta e comienso di un era nobo—maneho federal finalmente ta alcansando opinion publico.”






0 Comments