loader image

Prensa Mester Investiga Tambe e Distribucion di Informacion Publico

by | Oct 19, 2026 | Editorial | 0 comments

Ken ta dicidi cua medionan di comunicacion ta haya acceso na informacion di gobierno, departamentonan oficial y companianan estatal? Ken ta scoge cua periodista ta wordo invita, cua pregunta ta haya contesta, y cua medio di comunicacion ta keda structuralmente afo?

Esakinan no ta asuntonan interno di e gremio periodistico. Nan ta temanan fundamental di transparencia, dunamento di cuenta publico y e derecho inalienabel di e pueblo di Aruba pa wordo debidamente informa.

Ora un entidad publico suministra informacion, su meta principal mester ta informa comunidad en general, no premia un redaccion faborito, ignora periodistanan critico, ni proyecta un imagen faborabel sin base real. Noticia no ta un fabor personal cu un mandatario of departamento ta regala un reportero amigo.

Bureau Voorlichting (BUVO) tin como mision promove un relacion transparente entre gobernacion y e publico, coordinando campañanan, organisando conferencianan di prensa y conseha riba comunicacion. Net pa e motibo ey ta esencial pa stipula claramente cua ta e criteria pa haci e escogencianan aki: Ta trata di alcance, audiencia, relevancia periodistico, of lasonan politico? Un patronchi di exclusion continuo no por keda sin un splicacion verificabel.

E debate aki no ta nobo. Na september 2026, e asociacion Red Arubiano di Prensa Profesional (RAPP) a dirigi un peticion na premier Mike Eman pa introduci oranan di pregunta periodico y structural. Segun RAPP, tabatin un falta di conferencianan di prensa habri caminda periodistanan por haci preguntanan profundo y preguntanan di siguimento (follow-up), mientras cu tabata enfoca mas riba “fotomomentonan” y declaracionnan prepara di antemano. Un sesion di foto caminda gobernantenan ta djis hiba un mensahe no ta mescos cu un conferencia di prensa profesional caminda lidernan ta duna cuenta di berdad.

Companianan estatal y servicionan publico tambe mester por splica nan maneho di comunicacion. Mester mantene un distincion cla entre propaganda comercial, comunicadonan di prensa y noticianan independiente. Un aviso paga ta mercadeo; un comunicado ta e version di e remitente cu mester wordo verifica; y un noticia mester keda produci independientemente pa e redaccion sin ningun tipo di presion.

Prensa mes mester haci un auto-examen: documenta e invitacionnan ricibi, peticionnan di informacion nenga y casonan di falta di contesta, pa asina por sostene cualkier keho cu echo concreto na luga di speculacion.

E pregunta esencial ta simpel: ken ta dicidi ken ta haya informacion, ki momento y bao di cua condicionnan?

Gobierno no tin nodi di gusta tur publicacion, ni departamentonan publico no por spera un cobertura ciego sin critica. Pero e ciudadano si tin e derecho di spera cu informacion di interes general wordo comparti di un forma husto, transparente y sin faboritismo. Esun cu ta controla cua noticia ta yega na oido di e pueblo di Aruba, ta dicidi tambe kico e pueblo por sa. Pa e motibo ey, e poder tras di e distribucion di informacion mester keda bao di e lupa di investigacion continuo.

0 Comments

Submit a Comment

Your email address will not be published. Required fields are marked *

Download of lesa e ultimo corant publica.

Categoria Noticia Busca Archivo Modo

Categorias

Busca Articulo

Enable Notifications OK No thanks