Polis Hulandes a desmantela un cantidad record di laboratorio di droga na 2024, cu un tendencia preocupante: un cantidad creciente ta wordo haya den barionan residencial regular. Autoridadnan a descubri 167 laboratorio di droga den henter e pais aña pasa, 16 mas cu na 2023, y casi 60% di esakinan tabata situa den apartamento of cas.

Hefe di polis Willem Woelders a adverti cu organisacionnan criminal ta poniendo ciudadanonan comun den peliger door di opera den areanan urbano densamente pobla. “Nos a mira con cosnan por bay hopi robes,” el a bisa, citando un explosion mortal den un laboratorio di droga na Rotterdam cu a mata tres persona na februari 2024.

Mayoria di e laboratorionan desmantela tabata wordo uza pa produci droga sintetico, cu 47 laboratorio specificamente fabricando MDMA, e ingrediente principal den ecstasy. E cifra ey ta marca un aumento di 50% compara cu e aña anterior. Polis a descubri tambe 20 sitio unda cocaina tabata wordo corta cu Novocaine — un movecion cu e meta di extende volumen di producto y aumenta ganashi.

Fuera di e sitionan di produccion, Hulanda tambe ta lidiando cu un aumento den dumpmento di desperdicio kimico. Autoridadnan a registra 217 sitio di dump na 2024, e total mas halto desde 2018. Mientras cu algun desperdicio a wordo benta den areanan rural remoto, criminalnan tambe a recuri na metodonan di deshaci urbano, manera uza container di sushi bou tera na Amsterdam. Na Brabant, polis a descubri cu residuo kimico tabata wordo mescla cu sushi di bestia y plama riba tereno agricola — un practica potencialmente peligroso.

Mientras tanto, e cantidad di plantacionnan ilegal di marihuana haya a baha significativamente, bahando di 1.230 na 2023 pa 895 aña pasa. Provincia di Limburg a representa 157 di e plantacionnan aki, mas cu cualkier otro region. Hefe Woelders a sugeri cu e bahada por refleha un cambio den enfoke di polis for di cannabis pa droga mas duro, como tambe un aumento den importacion di marihuana cu ta reduci e necesidad pa cultivacion domestico.

E aumento den laboratorio di droga urbano no solamente ta lanta preocupacion di siguridad sino tambe ta refleha e tacticanan cambiante di crimen organisa. Door di hinca nan operacionnan den barionan di tur dia, gruponan criminal ta evita deteccion y ta beneficia di e anonimidad cu bida di ciudad druk ta provee. Sinembargo, e tactica aki ta trece riesgonan serio pa residentenan cerca, specialmente mirando e kimiconan volatil y e peligernan di candela envolvi den fabricacion di droga.

E peliger creciente no ta solamente teoretico. Segun un raportahe di De Telegraaf na juli ultimo, por lo menos dies persona a muri y cinco mas a resulta herida debi na explosionnan y lekmento di kimico na laboratorio di droga na Hulanda y net otro banda di frontera Belga durante e prome mita di 2024.

Cu e combinacion di aumento den descubrimento di laboratorio di droga, un aumento den produccion di MDMA, y metodonan di deshaci mas peligroso, autoridadnan Hulandes ta bisa cu nan ta intensificando esfuersonan pa sigui y desmantela e operacionnan aki prome cu nan pone mas bida na peliger.