Imagina si e wega politico no ta draai mas riba ken ta gana eleccion, sino riba ken ta maneha for di tras di cortina? Na Aruba, e influencia di gruponan di lobby poderoso riba maneho no ta un fenomeno recien. Durante gobierno tras di gobierno – for di robes te na drechi, cora of berde – un patronchi ta visibel: cierto actornan for di bista publico ta logra sigura nan interesnan cada bes, sin importa ken ta oficialmente na mando.

Nos mester tin curashi di ta honesto: no tur minister y partido ta laga nan wordo dirigi. Pero ta remarcabel con hopi biaha e mesun agendanan, companianan y individuonan ta haya nan deseonan cumpli na momentonan crucial. Mientras cu e pueblo ta keda dividi den lealtadnan politico – MEP contra AVP, coalicion contra oposicion – tin forsa activo cu no ta interesa den e lucha ey. Nan no tin mester di gana voto; nan tin influencia, acceso y recurso.

E pregunta cu rara bes ta wordo lanta publicamente ta: ken ta “nan”? Ken tin e placa, e rednan y e conexionnan strategico pa influencia legislacion, permisonan, subsidionan of proyectonan di gobierno di tal manera cu semper e ta beneficia algun? Hopi biaha, ta e mesun nombernan: companianan cu ta operando pa generacionnan, conseheronan cu raiz den multiple gabinete, of ex-politiconan cu awor ta “conseheronan informal.”

E realidad aki ta dificil pa captura den leynan of registronan. Pasobra na Aruba no tin un registro di lobby, ningun rapport publico di ken a drenta serca un minister ki ora, y ningun codigo di conducta cu ta limita e ‘draaideur effect’. Asina e liñanan ta keda vago – y esey ta precisamente e intencion.

Loke ta haci’e extra doloroso ta cu e influencia aki por persisti pasobra e pueblo ta dividi. Mientras cu e poblacion ta pega na escogencia di partido, candidato, slogan y promesa di eleccion, e poder real ta keda practicamente sin molester na su posicion. En bes di un debate publico tocante poder, influencia y structura, nos ta perde nos mes den lucha entre nos. Un situacion ideal pa esnan cu ta opera for di tras di cortina: tanten cu e masa ta pleita, ningun hende ta ripara ken realmente ta dicidi.

E dos forsanan politico mas grandi na Aruba, MEP y AVP, aparentemente ta bringa. Pero tin momentonan cu dossiernan – for di proyectonan grandi di infrastructura te na reformanan di impuesto – ta ricibi hopi poco oposicion. Esaki hopi biaha ta net e dossiernan unda e ‘man invisibel’ ya a pasa caba. E problema no ta mara na partido. E problema ta structural.

Si Aruba kier fortifica su democracia, e ta tempo pa transparencia radical. No combersacionnan tras di porta cera, sino responsabilidad publico. No funcionnan di conseho despues di politica sin un periodo di ‘descanso’. No influencia sin mandato.

Pasobra mientras cu e pueblo ta pensa cu eleccionnan ta determina tur cos, mientras cu e mesun gruponan di interes poderoso ta sigui dirigi for di tras di cortina, cambio real ta keda un ilusion.