Riba e articulo ‘Aruba tin dos gobierno?’ nos a haya como reaccion cu parlamento ta e organo mas halto di Aruba, y formalmente esey ta corecto tambe. Parlamento Arubano ta wordo describi den bukinan di derecho constitucional como e poder mas halto den e pais: e wardador di control democratico, e bos di pueblo y e guardianan di legislacion y maneho. Den practica, sin embargo, e posicion eleva ey ta mustra su mes cada biaha menos. Parlamento ta parce di ta comporta su mes mas y mas como un extension di e poder ehecutivo – un instituto decorativo cu ta aplaudi caminda e mester controla, y ta keda keto caminda e mester lanta su bos.

E diferencia entre e dos realidadnan aki – e rol formal y e practica real – ta preocupante y ta birando cada biaha mas visibel. Parlamentarionan cu den oposicion ta boga fuertemente pa transparencia, bon gobernacion y reflexion critico, ta parce di bira sordo y ciego diripiente ora nan drenta un coalicion. Diripiente reglanan ta conta menos, reunionnan ta wordo mira como innecesario, y e pensamento critico ta disparece tras di lealtad di partido. E moral selectivo aki tin un prijs halto: e perdida di credibilidad.

E Pueblo Cansa di e Weganan Politico

E sociedad Arubiano pa añanan caba ta wak cu frustracion creciente e wega politico cu ta ripiti su mes cu cada periodo di gobernacion. Mientras cu parlamento ta wordo scogi pa representa pueblo, su rol ta cambia cada biaha pa esun di un actor politico den un wega di poder. Desde Status Aparte na 1986 e patronchi aki apenas a cambia. Cada coalicion nobo ta priminti renobacion y responsabilidad, pero ta cay lihe den e mesun comportacion di auto-preservacion, politica di partido y conflicto di interes.

Y e poblacion? Nan ta cansa di dje. Na e ultimo eleccion, un cantidad record di ciudadano a scoge pa no vota, of pa duna nan voto na partido chikito of nobo. Mas di 20.000 voto no a bay pa e podernan tradicional – un señal cla di desaprobacion y un yamada pa cambio. Pasobra confiansa no ta bin di su mes. E mester wordo gana, manteni y defende.

Un Yamada pa Transparencia Radical

Parlamento tin un rol central den nos democracia, pero e rol ey ta significante solamente si e wordo cumpli realmente. Nos no ta scoge ministernan, nos ta scoge representantenan di pueblo. Parlamento mester ta e curason di control democratico – no e eco di gobierno.

Basta cu parlamentarionan ta sigui prefera nan interes personal of di partido riba e interes general, y basta cu ministernan por conta riba un bloke parlamentario sin critica, e instituto ta keda leu for di su obligacion. E maneho ta bira anto no un instrumento di gobernacion, sino un arena di weganan di poder.

Y si nos keda persisti den esey – si nos keda contento cu un parlamento cu solamente ta observa en bes di actua – anto nos tampoco no mester spera cu e respet of e luga di honor cu e ta merece, lo wordo duna di su mes. E luga ey mester wordo gana, no aclama.