loader image

Otro Forsa, Otro Promesa: Ayudo Ta Yegando Finalmente pa Haiti?

by | Sep 12, 2025 | Noticia Internacional | 0 comments

Mientras cu ministernan di exterior di henter Latino America y Caribe ta duna nan sosten completo na un esfuerso internacional nobo pa confronta e crisis di gang na Haiti cu ta bay for di man, un pregunta ta sigui resona den e campamentonan di esnan desplasa, e cayanan di Port-au-Prince, y e salanan di diplomacia internacional: Ki dia e sufrimento di Haiti finalmente lo stop?

E siman aki, 32 nacion den e Organisacion di Estadonan Americano (OAS) a firma un declaracion conhunto cu ta sostene un plan lidera pa Merca y Panama pa transforma e actual Mision Multinacional di Sosten di Siguridad (MSS) lidera pa Kenya den un “Forsa di Supresion di Gang” (GSF) mas robusto y mas agresivo. E meta: restaura siguridad basico den un pais unda gangnan arma a tuma over barionan principal, a desplasa mas di 1.3 miyon persona, y a mata mas di 3,000 hende te cu awo e aña aki.

E gobierno transitorio di Haiti a elogia e plan como un “paso decisivo” pa recupera autoridad estatal. Sosten a bin tambe for di e Comunidad Caribense (CARICOM), un señal di un consenso regional creciente. E forsa proponi lo crece na 5,500 tropa y lo ricibi sosten logistico mehora for di un Oficina di Sosten nobo di Nacionnan Uni.

Ainda asina, e dolor riba tereno ta profundo y implacabel. Jimmy “Barbecue” Chérizier, e lider di gang notorio tras di e coalicion Viv Ansanm, recientemente a bisa e Haitiano-nan cu nan por regresa na algun bario. Pero hopi di esnan cu a huy di e violencia no tin nada mas—ni cas, ni scol, ni trabou. Solamente e recuerdonan kibra di loke bida tabata prome cu e gangnan a tuma over.

Hasta esnan cu ta apoya e mision internacional ta reconoce cu siguridad so no lo ta suficiente. “Bo no por djis haci e parti humanitario riba su mes,” asina Tom Fletcher, e hefe di ayudo humanitario di N.U., a bisa durante su bishita na Haiti e siman aki. “Pero e strategia di siguridad tampoco lo no funciona sin un esfuerso humanitario serio—pa yuda hende bay cas bek, reconstrui, y haya nan bida y speransa bek.”

E speransa ey, pa awo, ta scars. Campamentonan di esnan desplasa ta yen-yen. Sobrevivientenan di violacion cometi pa gang y famianan cu ta huy di escuadronnan di morto ta papia di sinti nan mes abandona no solamente pa nan gobierno, pero pa mundo henter.

E situacion no ta solamente grave—e ta tambe peligrosamente compleho. Hopi miembro di gang ta teenager, algun forsa pa drenta violencia, otronan hala aden pa desesperacion y pobresa. “Esaki no ta djis tocante supresion,” asina Embahador di Antigua y Barbuda, Sir Ronald Sanders, a bisa, kende a yuda duna forma na e resolucion di OAS. “Nos tin cu pensa mas leu cu elimina lidernan di gang. Nos tin cu pensa riba e muchanan, e raiz di e problema, e falta di oportunidad.”

Mientras tanto, e financiamento pa e mision ta insigur. Aunke e plan ta construi riba contribucionnan di mantencion di paz di N.U., recortenan recien den e presupuesto Mericano na N.U. ta sembrando duda si e mision lo tin tur e recurso- y fondonan necesario.

Y asina e Haitiano-nan ta warda—un biaha mas. Otro resolucion internacional. Otro forsa stranhero. Otro promesa.

Pero te ora e balanan stop, te ora casnan wordo reconstrui, te ora muchanan por cana bay scol sin miedo, te ora e Haitiano-nan sinti cu nan ta doño di nan propio futuro, e pregunta ta keda.

Ki dia e sufrimento lo caba?

0 Comments

Submit a Comment

Your email address will not be published. Required fields are marked *

Download of lesa e ultimo corant publica.

Categoria Noticia Busca Archivo Modo

Categorias

Busca Articulo

Enable Notifications OK No thanks