loader image

Ora Venezuela Tabata Pasa Hamber, Mundo Tabata Keto. Awo Tur Hende Tin Algo di Bisa

by | Jan 6, 2026 | Noticia Internacional | 0 comments

Dia 3 di januari, mundo a lanta cu noticia di accion militar di Merca na Venezuela, un movecion dramatico y controversial cu a bolbe cende debate global. Awo, lidernan internacional, experto legal, y politiconan ta dunando nan opinion — condenando of defendiendo e atake, debatiendo soberania, citando e Carta di UN. Pero meymey di tur e boroto, un pregunta ta resona mas duro cu e resto: Unda e indignacion aki tabata ora Venezolanonan tabata pasa hamber?

Pa aña largo, e pueblo di Venezuela a biba door di un di e crisisnan humanitario y economico mas profundo den historia moderno. Mas cu 8 miyon Venezolano — casi un tercio di e poblacion — a hui for di e pais na pia, cu bus, cu boto. Hopi a cana crusa frontera cu nada otro cu un rugzak y un speransa pa sobrevivencia. Colombia, Brasil, Aruba, Corsou, y hopi otro pais den Latino America y Caribe a lucha pa absorbe e cantidad inmenso di famia desplasa.

Y toch, pa e tempo mas largo, mundo a bisa masha poco.

No tabatin sesion di emergencia di UN ora muchanan na Venezuela tabata muri di malnutricion of ora hospitalnan tabata opera sin suministro basico. Unda e discursonan ardiente di lidernan mundial tabata ora famianan tabata coba den sushi pa haya cuminda, of ora hiperinflacion a haci checknan di salario sin balor pa final di siman?

Awo, despues cu ehercito di Merca a interveni y Presidente Maduro a keda deteni, diripiente cada pais tin un opinion. Diripiente, tin indignacion tocante soberania y ley internacional — temanan cu tabata parce mucho menos urgente ora hende tabata djis purba sobrevivi.

E remarcanan reciente di e Secretario-General na e Conseho di Seguridad tabata cla y respetuoso — reafirmando e importancia di soberania, pas, y normanan legal. Pero un elemento clave tabata falta: e bosnan di e pueblo Venezolano mes.

Hopi biaha, ta papia di Venezuela — nunca cu ne. E elitenan politico, e ehercito, e hungadornan internacional tur ta papia duro. Pero e miyones di Venezolanonan comun y coriente, paden y pafo di e pais, ta keda sin wordo scucha.

Nan ta esnan cu a biba bou di un sistema kibra. Nan ta esnan cu a perde acceso na medicina, trabou, libertad, y cuminda. Nan ta esnan cu a risca tur cos djis pa haya seguridad — y awo, un biaha mas, nan ta mirando decisionnan tuma tocante nan pais sin wordo consulta.

E comunidad internacional tin un responsabilidad — no solamente pa mantene ley pero pa mantene dignidad. Esey ta nifica scucha. Esey ta nifica actua mas trempan, no solamente ora camaranan ta draai of fronteranan ta wordo crusa. Esey ta nifica reconoce cu e pueblo di Venezuela mester dicidi su futuro, no djis ta e suheto di un ‘touwtrek’ geopolitico.

Venezolanonan a sufri den silencio pa mucho largo. Mundo ta mirando awo — pero e mester scucha tambe.

0 Comments

Submit a Comment

Your email address will not be published. Required fields are marked *

Download of lesa e ultimo corant publica.

Categoria Noticia Busca Archivo Modo

Categorias

Busca Articulo

Enable Notifications OK No thanks