E Peso Inhusto riba Negoshi Chikito 

Pa un compania grandi, un factura pendiente por ta sinta den un departamento di contabilidad. E por ta wardando un aprobacion, un firma, un number di purchase order, un ciclo mensual di pago of simplemente e siguiente transferencia programa. Administrativamente, e por ta nada mas cu un retraso comun.

Pero pa un negoshi chikito, e mesun factura ey ta nifica algo completamente diferente.

E por nifica cu e huur di e luna aki no por wordo paga. E por nifica cu salarionan ta tarda. E por nifica cu e recibo di coriente mester warda. E por nifica cu un roveedor ta yamando pa cobra placa cu e negoshi no tin, debi cu su propio cliente no a pag’e ainda.

Aki ta e parti di e problema di pago retrasa cu hopi biaha ta keda lubida. Un negoshi chikito no tin miyones warda den reserva. Su fluho di caha (cash flow) ta move directamente for di un obligacion pa e siguiente: e placa cu drenta ta sali mesora pa empleadonan, huur, ekipo, combustibel, belasting y gastonan di operacion. Ora e pago no drenta na tempo, henter e cadena ta keda afecta.

Imagina un compania chikito cu ta finalisa un encargo pa un cliente grandi. E trabou ta cla, materialnan a wordo cumpra, gastonan di transporte a keda cubri y e negoshi a cumpli cu su parti di e acuerdo. E factura ta wordo entrega.

Trinta dia ta pasa. Despues 45. Despues 60.

E doño di negoshi ta keda tende cu e pago “ta den proceso”. Pero e doño di e edificio no ta acepta e frase “ta den proceso”. E trahadonan no por paga nan hipoteca ni haci compras cu e splicacion cu “contabilidad ta revisando e factura”. E proveedor di combustibel no por warda indefinidadmente. Y e comerciante chikito hopi biaha tin cu uza su propio spaargeld, carchi di credito of fiansanan caro djis pa sobrevivi mientras e ta warda riba placa cu el a traha pe caba.

Esaki ta lanta un pregunta incomodo: ki momento un tardansa administrativo ta bira un peso financiero inhusto imponi riba lomba di un otro hende?

Companianan grandi tambe tin procedura y motibonan legitimo pa revisa facturanan; no tur retraso ta a proposito. Pero e diferencia den tamaño ta crea un diferencia inmenso den e consecuencianan. Un empresa grandi por absorbe un retraso di un proveedor; un negoshi chikito hopi biaha no por wanta e tardansa di su cliente principal.

Ora un negoshi chikito no haya su pago, e ta tarda pa paga su propio proveedornan, creando un efecto domino cu ta afecta otronan cu ni tabata parti di e trato original.

Negoshinan chikito ta wordo elogia frecuentemente pa genera empleo y mantene e economia local bibo. Pero cash flow ta e oxigeno di un negoshi chikito. Paga un factura na tempo no ta djis un tramite di oficina; e ta parti di haci negoshi cu sentido di responsabilidad y etica.

Pa un compania grandi, paga un factura por ta un simpel liña den un computer. Pa un negoshi chikito, e mesun pago ey ta e salario di diabierna, e huur di otro luna, y e pan riba mesa di su hendenan.