loader image

Ora Simplemente Pasa door di e Dia Ta Suficiente

by | Sep 22, 2026 | Salud Mental | 0 comments

Kisas bo ta lesando esaki for di riba cama.

E gcortinanan ta cera ainda. Bo telefon ta benta banda di bo. Bo sa cu bo mester lanta. Bo sa cu tin cosnan ta warda riba bo — trabou, scol, yiunan, mensahenan, tayonan den cushina, responsabilidadnan y hendenan cu ta spera pa bo ta presente.

Pero bo curpa parce di no ta compronde e urgencia. Lanta for di cama ta sinti manera un tarea demasiado pisa. Y kisas e parti mas dificil ta cu bo no por splica pakico.

Di pafo, nada no ta parce robes. Bo por ta contesta mensahe ainda, bay trabou, hari ora un hende papia cu bo, y te hasta haci chansa cu amigonan. Pero paden, tur cos ta pisa doblemente. Drenta bao di douche ta sinti manera un obligacion. Cushina algo ta sinti complica. Limpia e camber ta parce imposibel. Contesta un simpel mensahe por dura oranan largo. Y haci plan pa otro siman no tin sentido, pasobra simplemente pasa dor di e dia di awe ta exigi tur energia cu bo tin.

Hendenan sa reacciona cu bon intencion: “djis lanta”, “sali pafo”, “pensa positivo”, “bo tin tanto cos pa ta agradecido p’e”. Pero ora un persona ta pasando den un bataya profundo, e palabranan ey por haci e distancia entre nan y resto di mundo sinti mas grandi ainda. Pasobra e persona sa caba kico e mester haci; e problema ta cu sa kico pa haci y tin e forsa pa haci’e no ta e mesun cos.

Tin biaha un hende no ta busca conseho. E ta busca un persona cu por sinta banda di dje sin exigi splicacion. Un hende cu por bisa: “Mi no ta compronde tur cos cu bo ta pasando aden, pero mi t’ey pa bo.”

Un tempo dificil no ta bo identidad permanente. Kisas bo no ta reconoce bo mes aworaki. Bo ta corda e persona cu tabatin energia, cu tabata hari facil y traha plan. Bo no a perde e persona ey; kisas bo ta simplemente cansa. Bida por bira pisa poco poco: presion financiero, problema di famia, soledad, perdida, conflicto y añanan cargando peso sin por pon’e abou.

Esaki no ta haci bo laf, ni debil. E ta nifica simplemente cu algo paden mester di atencion. Y tin biaha e prome paso ta cuminsa cu un frase sincero: “Mi no ta bon.” Bo no mester tin tur contesta aworaki, ni un plan pa e siguiente cinco añanan, ni pretende cu tur cos ta bon.

Speransa no ta nifica kere cu mañan tur cos lo ta maraviyoso di golpi. Kisas speransa ta simplemente acepta cu bo no sa ainda kico mañan lo trece: cua combersacion bo no a tene ainda, cua persona bo no a conoce ainda, of ki pida di bo mes por bolbe bek. Bo pio dia no por conta henter e historia di bo bida.

Si lanta for di cama ta sinti imposibel awe, no midi bo balor pa cuanto cos bo a logra. Habri e gerdijn por ta suficiente. Drenta bao di ducha por ta suficiente. Come algo, of simplemente pasa dor di e siguiente ora por ta suficiente. Keda un poco mas pa descubri kico ta bini despues.

0 Comments

Submit a Comment

Your email address will not be published. Required fields are marked *

Download of lesa e ultimo corant publica.

Categoria Noticia Busca Archivo Modo

Categorias

Busca Articulo

Enable Notifications OK No thanks