Nos tur conoce e sintimento. E tayonan ta acumula, e labamento di paña nunca ta caba, y bo yiu mester di algo—un biaha mas—mientras bo ta coriendo riba e ultimo druppel di gasoline. Bo ta grita bo pareha, bo ta lubida ki dia ta awe, y bo ta sinti cu apenas bo por wanta mas. Esey ta mas cu ta cansa. E ta ‘burnout’. Y si, ‘burnout’ di mayor ta real.

Mientras cu hopi biaha ta papia di ‘burnout’ den contexto di trabou, ta di argumenta cu ser mayor ta e trabou mas pisa di tur—y e unico cu bo no por djis ‘meld ziek’. E ta 24/7, emocionalmente intenso, y no tin dianan di descanso. Cu tempo, e nivel di presion ey ta cobra su prijs riba bo mente, bo curpa, y bo spirito.

Con ‘burnout’ di mayor ta sinti realmente?

E ta diferente for di stress di tur dia. Bo por sinti bo emocionalmente doof, como si fuera bo ta haciendo tur cos riba piloto automatico sin ta presente di berdad. Bo por perde pasenshi pa cosnan chikito of sinti bo culpabel pa no ta e mayor “dibertido” of cu pasenshi cu bo kier ta. Algun dia, hasta tareanan simpel—manera prepara cuminda pa scol of lesa un storia prome cu drumi—ta sinti abrumador. Bo ta fisicamente cansa, pero tambe mentalmente y emocionalmente agota. Y e parti mas pisa? Bo ta sinti bo isola, como si fuera ningun otro hende ta luchando mes tanto cu bo.

Pero bo no ta bo so. De hecho, mas mayor cu nunca ta experenciando ‘burnout’, specialmente den e mundo acelera y semper conecta di awe. Rednan social no ta yuda tampoco—nan ta inunda nos cu imagennan perfecto di famianan feliz y casnan impecabel, lagando nos sinti cu nos no ta logrando.

Con bo ta cuida bo mes ora ta parce cu no tin tempo of energia mas?

Cuminsa pa duna bo mes permiso pa no ta perfecto. Bo no mester haci tur cos, tur ora. Laga e culpabilidad bay si un anochi ta cereal tin di come of si e tempo di pantaya ta rek un poco mas largo cu custumber. Bo yiunan no mester di un superheroe—nan mester di un ser humano cu ta stima nan y cu ta cuida su mes tambe.

Pidi yudansa, hasta si e ta sinti incomodo. Sea ta un pareha, un amigo, of un bisiña, busca ayudo. Acepta sosten no ta nifica cu bo ta debil—e ta nifica cu bo ta sabi. Y si bo ta sinti bo cronicamente abruma of verdoofd, considera papia cu un terapista of consehero. Salud mental ta mesun importante pa mayornan cu pa cualkier otro hende.

Crea momentonan chikito pa bo mes. Un caminata. Un cop’i thee den trankilidad. Un yamada cu un amigo cu no ta huzga. Bo no mester di un weekend di spa pa reset—tin biaha djis dies minuut di espacio pa hala rosea por haci un mundo di diferencia.

Y finalmente, papia di dje. Normalisa e combersacion rond di ‘burnout’ di mayor. Nos tur ta luchando cu asina tanto cos tras di cortina, y ningun hende no mester sinti cu e ta fracasando djis pasobra e ta humano.

Ser un mayor ta bunita, pero e ta pisa tambe. Algun dia lo prueba cada tiki di bo pasenshi y energia. Pero reconoce ‘burnout’ ta e prome paso pa move atraves di dje—y corda cu cuida bo mes ta cuida bo famia.