Dicon mi ta sinti cu mi tin cu defende mi mes pa scoge marihuana pa maneha mi ansiedad? E momento cu mi bis’e na bos halto, e huzgamento ta bini den olanan—wenkbrauw lanta, comentarionan di dwars, sermonnan tocante “flohera” of “abuso di substancia.” Pero ningun hende no ta ni reacciona ora un otro persona ta bebe un pildo receta pa e mesun cos.
Dicon ta asina? Dicon remedi receta ta automaticamente “miho” cu cannabis?
Ansiedad ta real. Pa algun di nos, e ta diario, agotador y impredecibel. Y e berdad ta cu no tin un solucion cu ta pas pa tur hende. Algun hende ta florece cu terapia. Algun ta haya alivio den remedi. Y algun—ami inclui—ta haya cu marihuana ta traha na maneranan cu nada otro no a yega di haci.
Pero sociedad ainda ta trat’e como un maldad.
Nos a normalisa antidepresivo, pildo contra ansiedad, pildo pa drumi, y stimulant te na e punto cu hende ta haci joke di “mester di nan remedi” djis pa por funciona. Y laga nos ta cla: e remedinan ey ta salba bida. Pero nan tambe ta kimico, cu efectonan secundario, riesgonan y problemanan di dependencia di nan mes.
Pues, dicon ta scoge net cannabis como e malechor?
Kisas ta historia. Decadanan di campañanan di miedo a pinta marihuana como algo peligroso, adictivo y moralmente corupto. Kisas ta politica—leynan traha riba ideanan anticua cu a criminalisa comunidadnan en bes di atende cu necesidadnan real di salud. Of kisas ta djis stigma—hende ainda ta imaginando “stoners” en bes di pashent, hendenan buscando bienestar, of hende comun y coriente purbando di sinti nan mes OK.
Pero esaki ta loke mi sa: marihuana no merece e doble standard aki.
Ora mi us’e responsabelmente, e ta calma mi pensamentonan, yuda mi drumi, y duna mi e espacio pa hala rosea sin hoga den panico. No ta trata di “bira halto.” Ta trata di maneha un condicion na un manera cu ta funciona pa mi. Y pa hopi otro, e ta e diferencia entre sobrevivi y realmente biba.
Pues, dicon mi tin cu defende esey? Dicon mi tin cu hustifica mi escogencia ora otronan no tin cu splica dicon nan ta tumando un pildo cu un lista largo di efecto secundario cu ta zona mas spantoso cu e malesa mes?
E pregunta mas grandi ta: Ken ta esun cu ta dicidi kico ta “remedi di berdad”? Companianan farmaceutico cu ta probecha di receta? Gobiernonan cu apenas a cuminsa legalisa cannabis? Of e hendenan cu di berdad ta biba cu ansiedad y sa kico ta trece alivio pa nan?
Na final di dia, e derecho di scoge con nos ta cuida nos salud mental mester pertenece na nos—no na huzgamento, stigma of leynan anticua. Sea ta un boter di pildo of un joint lora, e meta ta mescos: paz, balansa y curacion.
Pues no, mi no debe ningun hende un defensa. Mi ansiedad ta real. Mi alivio ta real. Y mi escogencia ta valido—mesun valido cu cualkier receta den un boter blanco cu nomber di un dokter ariba.
Si remedi receta ta ser acepta sin pregunta, e ora ey marihuana tambe mester ser acepta. Cualkier cos menos cu esey ta hipocresia.






0 Comments