Na Aruba, e tema di migracion sin documento ta genera debatenan intenso, specialmente cu e aumento reciente di detencionnan. Como miembro di e comunidad aki, mi ta preocupa pa e manera cu ta maneha e accionnan aki y e mensahe cu ta wordo manda. No por ignora e diferencia entre ta ilegal y ta indocumenta, ni e impacto cu esaki tin riba e sociedad.

E termino “ilegal” ta wordo uza di forma denigrante pa describi esnan cu no tin documento na ordo, pero niun hende ta ilegal pa existi. Hopi hende a yega Aruba buscando oportunidad of scapando di crisis den nan pais. Ta indocumenta solamente ta nifica no conta cu e permitnan legal necesario, no cu a comete un crimen grave. Sinembargo, e trato cu ta wordo duna na e personanan aki hopi biaha ta como si nan ta delincuente peligroso.

Awor, mester puntra: dicon e gobierno aki a permiti pa añanan e yegada di migrantenan y awor, na final di su mandato, ta dicidi di actua cu man duro? Ta parce un medida mas politico cu humanitario. E carcelnan di Wardacosta ta yen, pero unda e control aki tabata antes? Dicon no a detene e lanchanan ora nan tabata drenta sin restriccion? E ta duna e impresion cu a tolera migracion ora tabata conveniente, y awor cu e situacion a cambia, ta busca pa castiga esaki.

Ta berdad cu Aruba no por ricibi mas hende sin control, pero tambe ta un realidad cu e pais tin mester di trahadornan. En bes di simplemente yena celnan cu indocumentadonan, mester traha na solucionnan real manera agilisa procesonan di regularisacion y establece normanan cla pa futuro entradanan. E economia di Aruba ta depende en gran parti di e man di obra stranhero, y elimina nan di golpi sin un plan solamente lo trece mas problema.

Como Arubiano/ Latino, mi kier lo mihor pa mi pais. No por cera wowo pa e crisis migratorio, pero tampoco por permiti cu e solucion ta encera represalianan politico disfrasa como medidanan di orden. Ta momento pa gobierno actua cu responsabilidad y establece un sistema husto pa regularisa esnan cu ya ta aki, mientras cu ta pone reglanan firme pa futuro. Aruba ta na un punto critico, y e manera cu ta maneha e situacion aki lo defini su stabilidad den e proximo añanan.

*Articulo a wordo traduci y adapta pa publicacion den AWEMainta