Constantemente nos ta wordo inunda cu storianan positivo for di e institucionnan medico na Aruba. Un tras otro cu orguyo ta anuncia tecnologianan nobo: cirugia robótico, turismo medico, metodonan innovativo di tratamento. E institutonan medico ta briya den medionan, cu potretnan di aparatonan moderno, cifranan gososo y un abundancia di felicitacion pa nan “avancenan.” Pero esun cu scucha realmente kico ta wordo bisa riba caya, ta tende completamente un otro storia. Un realidad cu ta yena cu tristesa, frustracion y perdida.

Pasobra tras di tur e fachadanan briyante ey, tin un berdad duro: e cuido di salud na Aruba ta faya riba hopi tereno. Cada bes mas ciudadano, hopi biaha demasiado hoben, ta muri innecesariamente despues di a wordo manda cas for di servicionan di emergencia. Algun ta fayece poco despues – un persona hasta riba e parkeo di e institucion. E incidentenan aki no ta excepcionnan mas, sino síntomanan di un sistema cu structuralmente ta faya.

E sociedad ta mira esaki. Facebook ta yen cu video, testimonio y explosionnan emocional di famianan cu ta sinti nan mes abandona. Hende ta keha pa añanan largo riba temponan largo di espera, specialistanan inalcansabel y indiferencia na balie di administracion. Sinembargo, ta parce cu for di e institucionnan medico aki no tin casi ningun accion. En bes di transparencia y responsabilidad, nos ta haya propagandanan paga cu ta mustra mas ariba un tipo di ‘window dressing’ cu avance nan real. E mensahe ta zona cada bes: “Nos tin e miho cuido den e region.” Pero bay conta esey na e famia cu a perde un ser keri despues cu el a wordo manda cas sin un diagnostico ni tratamento, of na e persona sufriendo di dolor pa lunas prome cu haya un specialista mir’e.

Loke ta mas tristo ainda: parce di no tin consecuencia pa erornan cu ta costa bida di hende. Ekibocacionnan medico ta disparce trankil bou di e tapijt. E responsabelnan ta sigui gewoon comosifuera nada no a pasa. Entretanto, e victimanan y nan famianan ta keda atras cu preguntanan, tristesa y rabia. Den cualkier otro sector negligencia grave lo hiba na sancionnan, suspension of persecucion. Pero den e cuido? Eynan parce cu ta tapa solo cu un dede.

E confiansa di e pueblo ta cabando. Y cu rason. Pasobra en bes di tuma e nucleo di nan tarea na serio – e dunamento di cuido di bon calidad na e pueblo di Aruba – e institucionnan ta scoge pa campañanan cosmético di PR y auto-glorificacion superficial. Tanten cu no bin un mehoracion fundamental den e organisacion, comunicacion y acercamento cu enfasis riba hende den cuido, tur e bon charlanan ey no ta mas cu un forma di “window dressing.”

E articulo di opinion aki no ta un atake riba e dunadornan individual di cuido, di cual hopi ta compromete nan mes dia’den dia’fo bao circunstancianan dificil. E ta un yamada na e lidernan di e institucionnan di cuido na Aruba pa coregi nan prioridadnan. No mas potret nobo pa den corant te ora e problemanan fundamental wordo atendi. No mas celebracionnan di “exito” tanten cu ciudadanonan ta muri pa motibo di negligencia.

Cuido no ta PR, e ta un responsabilidad. Y e responsabilidad ey actualmente no ta wordo bon cumpli cu ne. Ta tempo cu e cuido di salud Arubano stop di ‘polish’ su imagen, y finalmente cuminsa drecha e confiansa di su poblacion – door di haci loke ta conta realmente: salba bida.

Nomber y Adres conoci pa Redaccion.

*Articulo adapta pa publicacion den AWEMainta