Personal di HOH Merece Mas cu ‘Lapi Lapi’ — Ta Tempo pa un Investigacion Completo

Apreciabel Editor,

Como un empleado cu hopi aña di servicio na Horacio Oduber Hospital (HOH), mi ta skirbi e carta aki no solamente pa motibo di preocupacion — sino pa motibo di un frustracion cu a bin ta creciendo silenciosamente entre personal pa mucho tempo. Riba 28 di juni, nos a wordo informa di un otro fayo tecnico den e sistema di friamento di hospital, afectando e piso abou, prome, y di dos di Toren B. Mientras nos team tecnico — hunto cu sosten di SOGA — constantemente ta traha duro pa restaura comodidad, e problema mas grandi ta keda ignora.

Fayo Recurrente y un Necesidad pa Transparencia

Esaki no ta e prome biaha cu nos a experencia tal interupcionnan. Lamentablemente, e incidentenan aki ta birando demasiado familiar. Fayo di airco, ekipo defectuoso, lekmento di awa, y otro problemanan tecnico ta parce di ta problema recurrente dentro di nos facilidad “modernisa.” Esakinan no ta djis inoportuno — nan ta señalnan di un problema mas profundo, y nan ta compromete e calidad di cuido cu nos mester provee.

Ta tempo pa gobierno — specificamente Minister di Salud — lansa un investigacion completo y independiente den e reconstruccion di HOH, incluyendo calidad di material uza, e contratistanan contrata, y e supervision cu tabata (of no tabata) na luga. Nos tin mester di transparencia, no djis ‘lapi lapi’ temporal. Nos tin mester di responsabilidad — no silencio.

Hospital a wordo reconstrui cu fondo publico, cu e promesa di crea un ambiente mas sigur y mas confiabel pa tanto pashent como personal. Pero para den e gangnan di Toren B cu sodo ta core, purbando di consola un pashent of prepara medicamento, ta dificil pa no sinti cu nos a wordo laga atras den e promesa ey.

Un Cultura di Silencio y un Grito pa Dignidad Laboral

Locual ta mas pio ta e cultura di silencio rond di e problemnan aki. Ta spera cu personal lo sigui traha, haci uzo di locual tin, y “ta flexibel.” Pero con flexibel un hende por ta ora sistemanan ta faya, dia tras dia? Cuanto tempo mas nos mester sigui acepta esaki como normal?

Tin tambe un sentido creciente cu esnan den posicionnan mas halto ta trata personal di prome liña como si fuera nos ta reemplasabel — ta wordo spera di nos pa traha den cualkier situacion, cu minimo entrada of sosten. Esey no ta djis inhusto; e ta insigur. Un hospital mester ta un santuario di cuido, no un luga caminda trahadornan ta sinti nan neglisha of ignora.

Nos ta pidiendo pa:

• Un revision tecnico di henter e infrastructura di hospital.
• Publicacion di e descubrimentonan.
• Consecuencianan cla pa cualkier fayo of negligencia descubri.
• Y mas importante, un garantia cu nos ta trahando den un ambiente sigur y bon manteni.

Esaki no ta un demanda pa luho — e ta un yamada pa siguridad basico na luga di trabou y dignidad.

Nos, e personal, ta curason di e hospital aki. Nos ta presente tur dia pa cuida otronan, hasta ora e ambiente ta haci esey mas dificil di loke mester ta. Pero nos compasion no mester wordo confundi cu complaciencia. Nos ta papia awor pasobra nos ta preocupa profundamente — tocante nos pashentnan, tocante nos coleganan, y tocante futuro di cuido medico na Aruba.

Nos ta urgi e Ministerio di Salud y tur partido responsabel pa tuma e problema aki seriamente. E pueblo di Aruba merece miho, y asina tambe e hendenan cu ta sirbinan.

– Un Empleado Preocupa di HOH