Tempo pa Cambio den Industria Hotelero di Aruba

Como un empleado den e sector hotelero Arubiano cu añanan di experiencia, mi ta sinti e necesidad di trece dilanti un situacion cu pa mucho tempo ta keda bou di superficie. Aunke no tur hotel ta culpabel di esaki, tin establecimentonan unda respet y siguridad pa e personal ta laga hopi di desea. Demasiado biaha un cultura di miedo ta prevalece, caminda empleadonan no ta tribi di expresa nan mes for di miedo pa represalia. Ta tempo pa nos papia abiertamente di esaki.

No Tur Hotel, pero Si Algun

Laga esaki ta cla: tin hotelnan na Aruba unda e personal ta wordo trata corectamente y cu respet. E hotelnan aki ta cumpli cu reglanan y ta crea un ambiente di trabou positivo. Lamentablemente, esaki no ta e caso tur caminda. Den cierto hotelnan, e maneho ta laga seriamente di desea. Tin kehonan di comportacion denigrante, intimidacion verbal y remarkenan ofensivo dirigi specialmente riba empleadonan femenino. Locual ta mas tristo: e casonan aki SI ta wordo raporta, pero raramente tin accion. HR ta wordo informa, supervisor ta wordo poni na altura – y asina mes nada no ta cambia.

Un Ambiente di Trabou Yen di Miedo y Desigualdad

Mayoria empleado di hotel simplemente kier haci nan trabou, bay cas y cuida nan famia. Na su luga, hopi ta bin tur dia na un luga di trabou unda stress, incertidumbre y miedo ta prevalece. Hopi ta hende muhe, ta bin di otro pais, kisas no ta papia e idioma bon of no ta completamente na altura di nan derechonan. Nan ta keda keto, for di miedo cu ningun hende lo tuma nan na serio – of cu e lo costa nan nan trabou.

Consecuencianan di Keda Keto

Tin un nocion hopi comun: “E cliente semper tin rason,” of: “Djies haci bo trabou y no keha.” Pero esaki no por ta un excusa pa tolera comportacion indeseabel. Cada miembro di personal, sin importa funcion of departamento, ta merece un luga di trabou sigur y respetuoso. Ora kehonan wordo ignora structuralmente, empleadonan ta sinti nan invisibel y insignificante. Esaki ta conduci na apatia, desconfiansa y e normalisacion di inhusticia.

Un Yamada na Responsabilidad

Mi sa cu tin ehempelnan bon den nos sector tambe – y esakinan mester wordo aprecia. Pero ta tempo pa nos nombra e inhusticianan tambe. Si bo ta doño of un manager den un hotel y bo sa cu tin comportacion inapropia ta tuma luga den bo team, tuma responsabilidad. No mira pa otro banda. No proteha e hendenan robes djis pasobra nan tin hopi aña di servicio. Pensa riba bo team. Pensa riba e hendenan cu ta traha duro pa bo tur dia.

Nos, e personal, ta dedica nos mes pa huespednan sinti nan bon bini y aprecia. E unico cos cu nos ta pidi ta pa nos mes tambe sinti sigur, respeta y aprecia.

Esaki no ta un acusacion di rabia of en busca di sensacion. Esaki ta un yamada pa mehoracion. Laga nos traha hunto pa un industria hotelero mas saludabel y husto na Aruba – pa tur hende.