Nepal a intensifica su operacionnan di rescate pa yega na cientos di persona cu ta teme cu ta atrapa den tunnelnan di proyectonan hidroelectrico cu a sufri daño grandi door di inundacionnan catastrofico den seronan di Himalaya.
Autoridadnan a uza helicopter pa transporta mashin y ekipo pisa pa e zonanan remoto di desaster, mientras ekiponan di rescate ta purba drenta e tunnelnan cu a keda tapa cu lodo, piedra y sushi. Ta calcula cu alrededor di 350 persona ta atrapa na e compleho hidroelectrico di Upper Trishuli den e districtonan di Nuwakot y Rasuwa.
E inundacion grandi a cuminsa dia 26 di augustus despues cu un bloki grandi di ijs (glacier) a basha abou cerca di e frontera entre Nepal y China, mandando un volumen inmenso di awa, ijs y piedra den e vayenan rond. Comunidadnan, camindanan, brugnan y plantanan di electricidad a keda destrui den poco tempo sin duna espacio pa evacua.
E catastrofe aki a cobra bida di mas di 780 persona na Nepal, mientras miles di hende ta keda perdi den e areanan afecta di Nepal y Tibet. Ta calcula cu mas di 90.000 persona a keda afecta pa e desaster transfronteriso aki.
Alrededor di 10.000 solda Nepali a keda mobilisa, mientras teamnan specialisa di India y China tambe ta brindando ayudo. E tereno dificil, yobidanan continuo y camindanan kibra ta haci e acceso sumamente complica.
Avance den e Rescate
Rescatistanan a logra un avance importante diadomingo ora nan a yega na e entrada di Tunnel 3A na Upper Trishuli y a cuminsa kita e material cu tabata bloki’e. Dos persona a keda rescata caba. Teamnan ta preparando pa drenta cu camara y tankinan di oxigeno pa evalua e condicionnan y busca mas sobreviviente. E area principal unda e trahadonan por a busca refugio ta keda alrededor di 180 meter for di e entrada.
Autoridadnan no por confirma e estado di e personanan bou di tera. E tunnelnan por a proteha algun trahado for di e prome forsa di e awa, pero nan por ta contene lodo y falta di oxigeno. Rescatistanan mester move lihe pero cu sumo cuidou pa no causa mas derumbe.
Golpi pa Energia y e Peliger Climatico
E desaster a afecta severamente e red electrico di Nepal, eliminando alrededor di 10% di e capacidad nacional di produci coriente. Restaura e facilidadnan aki por dura lunanan largo.
E tragedia aki ta lanta preocupacion di nobo riba e vulnerabilidad di e infrastructura den e region di Himalaya debi na cambio climatico:
- Temperatura halto ta destabilisa ijsnan gigantesco.
- Ora e damnan natural aki basha abou, e awanan ta baha cu velocidad destructivo.
- Proyectonan grandi ta keda construi den zonanan exponi na temblor y lodo.
E tragedia aki lo por trece mas demanda pa sistemanan di alerta trempan y miho coordinacion entre Nepal y China. Pa awor, henter e atencion ta keda riba e tunnelnan cera, unda cada piedra cu wordo kita por nifica salba un bida mas.






0 Comments