Ora Yuda Hende Bira un Show

No tin nada malo den yuda un prohimo. Si bo tin e recursonan pa cumpra cuminda pa un famia cu ta pasando den dificultad, paga un recibo, yuda un hende grandi, asisti un persona sin cas of sostene un hende cu ta pasando den un momento pisa, haci’e. Yuda ta bon; compasion ta bunita; sosten comunitario ta esencial.

Pero ora e camara sali, ora e video wordo edita cu musica tristo, ora e persona vulnerabel bira e figura central y ora publica e grabacion pa miles di hende mira, un otro pregunta ta lanta: ken esaki realmente ta yudando?

Esaki ta loke por yama “miseria pa interaccion” (misery for engagement). E concepto aki ta describi un tendencia cada bes mas bisto den e era di rednan social: haci un acto cu kisas realmente ta yuda un persona, pero simultaneamente uzando e situacion doloroso di e persona ey pa genera atencion, simpatia publico, siguidor, comentario, donacion y hasta placa.

E ayudo por ta real, e necesidad por ta berdadero, pero e publico tambe ta real. Y esey ta cambia e panorama etico completamente. Expertonan y investigadornan a yega di adverti caba tocante e fenomeno conoci como “pornografia di pobresa” (poverty porn), caminda exposicion di sufrimento ta kita e dignidad di e persona y ta reduci’e na un simple obheto di compasion.

Awe, haci un bon obra a bira contenido pa rednan social. Un camara ta graba e momento preciso cu un hende ta haya cuminda; un video ta mustra e condicion deplorabel di un cas; un creador di contenido ta enfoca riba e lagrimanan di un mama cu ta ricibi placa. Despues ta bin e reaccionnan:

• E views;
• E likes;
• E shares;
• E alabansanan: “Mira con bon hende e ta.”

Aki ta unda caridad ta cuminsa parce actuacion. Tin hende cu ta uza nan plataforma pa crea consciencia of pa recauda fondo pa casonan legitimo, pero nos mester haci e pregunta incomodo: nos tin mester realmente di expone miseria di otro ser humano pa demostra cu nos ta bon hende?

Si bo kier yuda, yuda. Si bo kier pa otronan contribui, splica e problema. Si bo kier recauda fondo, mustra transparencia riba con ta uza e placa. Pero dicon e persona vulnerabel mester bira e propaganda? Dicon su huicio of necesidad mester bira e imagen principal (thumbnail) pa hala bista? Dicon su lagrimanan mester ta e gancho emocional pa fortalece e imagen personal di un otro?

Y e pregunta di mas grandi: e mesun ayudo ey lo a tuma luga si no tabatin camara, si no tabatin publico, y si no tabatin atencion a cambio?

Aruba ta un comunidad chikito; nos tur conoce otro. Un video publica awe ta keda biba riba internet pa semper. Un persona cu kisas a acepta pa wordo graba den un momento di desesperacion por sinti berguensa mañan ora miles di hende mira su pio momento.

Yuda hende sin haci nan dolor bo producto. Haci e bon obra, laga e persona mantene su dignidad, y si ningun hende nunca descubri loke bo a haci, no pensa cu e acto a perde balor: kisas esey precisamente ta e version di mas puro di caridad.