Ken Ta Exigi Gobierno pa Corta Su Propio Gastonan?
E debate rond di salario minimo na Aruba ta pone trahadornan y doñonan di trabou un biaha mas contra otro den e discusion economico. E trahador mester di mas poder di compra pa sobrevivi. Negoshinan chikito ta preocupa pa e aumento di gastonan di payroll. Mientrastanto, gobierno ta presenta e aumento di salario como un solucion pa mehora e posicion financiero di e hogarnan.
Sinembargo hopi biaha a exigi gobierno pa frena su propio gastonan, sin tin siguransa cu esaki a keda realisa.
Esaki no ta un tema nobo. Finanzas publico di Aruba ta bou di lupa pa hopi aña, y recomendacionnan pa reduci of contene gastonan di aparato gubernamental a keda ripiti bes tras bes den informenan di instancianan di supervision financiero y organismonan internacional.
Na 2017, Fondo Monetario Internacional (IMF) a señala cu CAft tabata di opinion cu no por logra finansas publico sostenibel sin reduccionnan structural den gasto, incluyendo e gastonan di personal y di cuido medico.
Na 2019, Algemene Rekenkamer Aruba (ARA) a bati alarma riba e gastonan di overtime den departamentonan hudicial manera Cuerpo Policial, KIA y Cuerpo Especial Arubano. ARA a constata cu e gastonan di overtime den e departamentonan ey a redobla den dies aña, y cu no tabatin ningun plan concreto pa reduci nan.
E punto aki ta crucial pasobra gastonan di personal semper tabata un di e componentenan di mas grandi den presupuesto di pais Aruba. E pregunta no ta si empleadonan publico ta necesario, pasobra nan ta esencial. E berdadero pregunta ta si e cantidad di personal, overtime, compensacionnan y e structura organisacional ta wordo maneha cu eficiencia, y si e pueblo ta haya balor real pa cada florin cu wordo gasta.
E recomendacionnan a sigui bin. Na 2023, IMF a bolbe pidi Aruba pa contene e cuenta di salario di gobierno, re-evalua gastonan den bienes y servicionan, reduci subsidionan ineficiente y dirigi fondonan pa inversionnan publico productivo. Na 2025, IMF a reitera e necesidad pa contene gastonan di salario, revisa beneficionan adicional y mehora e transparencia financiero den companianan estatal.
Aunke gobierno a reporta cumplimento cu e normanan financiero di LAft na 2024, cumpli riba papel cu un norma fiscal no ta nifica automaticamente cu e aparato publico a bira mas eficiente, mas chikito of menos costoso, ni cu e servicionan na comunidad a mehora.
E distincion aki ta e curason di e discusion actual: si ta pidi e doño di trabou pa absorbe gastonan laboral mas halto pa yuda e trahador cu e costo di bida, gobierno tambe mester ta dispuesto pa pasa man den su propio saco. E pueblo tin derecho di puntra si a elimina gastonan inecesario y si cada florin gasta ta duna un beneficio bisto.
E debate no mester bira un bataya entre trahador y comerciante. Ambos ta keda den incertidumbre mientras e peso ta cay riba nan lomba. Gobierno tin e tarea di proteha poder di compra, pero e tin e mesun obligacion grandi pa maneha placa di pueblo cu prudencia.
E pregunta final ta pa e pueblo di Aruba: bo ta kere cu gobiernonan realmente a baha nan gastonan y a mehora eficiencia of ta pueblo y comercio semper mester keda carga e peso economico?






0 Comments