Den un entrevista recien na Barbá Cu Dos Mic, Jason Yarzagaray a sinta unrato cu e experto den innovacion y empresario pa cuater biaha Michael Tchong, fundador di Ubertrends Academy, Tchong a comparti ideanan poderoso riba con inteligencia artificial (AI) ta transformando liderazgo, negoshi y sociedad. Tchong, kende su buki mas nobo AI CEO: The Shift Is Here (E Cambio Ta Aki) ta explora e colaboracion creciente entre humano y sistemanan inteligente, unda e ta splica dicon nos ta na comienso di e disrupcion tecnologico di mas grandi den historia.

Tchong a introduci e concepto di e “AI Co-CEO”, unda inteligencia artificial ta maneha operacion y strategia mientras lidernan humano ta enfoca riba empatia y coneccion humano. “Den e etapanan inicial, nos lo mira AI Co-CEOnan dirigiendo operacion, mientras cu e CEO-nan ta bira ‘chief empathy officers’ (oficialnan principal di empatia),” Tchong a splica. El a enfatisa cu e futuro di liderazgo no ta artificial pero ‘augmenta’ (amplia), nificando cu lidernan mester siña colabora cu sistemanan di AI pa asina mehora e creatividad y ora di tuma decisionan importante.

Apesar di entusiasmo generalisa, Tchong a spierta cu hopi ehecutivo cu ta subestima e potencial di AI. Mayoria usuario actual ta depende di hermentnan manera ChatGPT pa skirbi y edita, el a nota, pero poco ta explora su uzo den planificacion strategico of innovacion. “AI no ta djis un herment pa skirbi; e ta un socio den desaroyo y strategia,” Tchong a bisa.

Tchong tambe a señala cambionan rapido den e luga di trabao. El a destaca e retironan masal den corporacionnan grandi, manera e 15.000 cupo di trabao corta na Microsoft atribui na e placanan spaar pa medio di AI, como evidencia di e impacto economico di automatizacion. E ta predeci cu te na mita di e trabao ‘white-collar’ (di oficina) por wordo desplasa mientras AI ta sigui evoluciona, urgiendo lidernan pa enfoca riba ‘reskilling’ (capacitacion nobo) y adaptacion.

Ora a puntra tocante e implicacionnan pa comunidadnan mas chikito manera Aruba, Tchong a subraya e urgencia di preparacion. “Esaki ta e disrupcion di mas grandi di tur tempo,” el a bisa. “Ta keda na nos como sociedad pa busca maneranan nobo pa mitiga e impacto y probecha e oportunidadnan cu AI ta trece.”

Mirando pa futuro, Tchong a identifica ‘influencers’ genera pa AI como un tendencia grandi cu ta na caminda. E personanan digital aki, impulsa pa modelonan avansa manera Sora 2, por revoluciona mercadeo y creacion di contenido door di surpasa ‘influencers’ humano—interumpiendo un industria global cu ta bal mas cu $30 biyon.

Ubertrends Academy di Tchong lo organisa un seminario online na December, titula AI CEO: The Shift Is Here. E sesion informativo ehecutivo di 90 minuut lo guia participantenan atravez di e ritmo rapido di innovacion di AI, duna un ‘playbook’ (manual practico) di AI, y destaca hermentnan pa lidernan cu ta buscando pa keda dilanti den e era digital.

El a cera cu optimismo pa empresarionan: “AI a haci mi bida como empresario hopi mas facil. Un dia, nos por hasta mira un compania di un persona cu balor di un biyon dollar.”

Carchinan pa e workshop di December lo ta obtenibel na ubertrends.com/academy y via Vibration PR Aruba.