Aruba Ta Creando un Forsa Laboral Frustra?

Kico lo pasa si nos haci cada trahado na Aruba un pregunta incomodo: “Bo ta gusta bo trabou realmente?”

No puntra: “Bo tin trabou?”, “Bo ta agradecido di tin un entrada?”, ni “E salario ta pasabel?” Sino simplemente: bo ta lanta cu gana di bay traha?

Cifranan oficial di e Encuesta di Forsa Laboral 2024 a raporta un desempleo abou di 4.3% y un empleo di 60.8%. Pero e estadisticanan aki ta djis mustra si hende ta ocupa, no si nan ta contento, motiva of simplemente contando e oranan pa bay cas. Pasobra tin un trabou y tin un bon trabou ta dos cos completamente diferente.

Tuma e empleado cu a mira su tareanan redobla aña tras aña mientras su salario ta keda igual:

• Mas cliente pa atende;
• Mas formulario y raport pa entrega;
• Mas sistema digital pa domina;
• Mas responsabilidad y problema pa resolve.

Pero ora e trahado puntra pa un reconocemento financiero, e contesta ta bini lihe: “No tin presupuesto.” E situacion aki ta sembra un rencor profundo. Desde 1 di januari 2026, e salario minimo legal pa ora na Aruba ta Afl. 11.58, un medida pa garantisa miho compensacion pa ora. Pero e problema fundamental no ta solamente e minimo legal; ta e sintimento di kico un persona ta sinti cu su esfuerso ta bal.

Banda di esey, tin e ambiente laboral toxico: e supervisor cu ta humiya, e hefe cu tin preferi, y e cultura unda ta castiga esun cu papia berdad. Bo por paga un persona rasonabelmente bon y toch haci su bida un nachtmerrie tur dia laboral.

Despues ta bin e falta di perspectiva: un persona ta traha cinco, dies of diescinco aña y ta ripara cu nada no ta cambia. No tin promocion, no tin desaroyo profesional ni caminda pa crece; djis un aña mas di e mesun rutina. Ora posicionnan clave wordo duna a base di amistad y no a base di merito, e trahado ta siña un les amargo: haci bo trabou bon no ta suficiente.

Un di e problemanan mas grandi y invisibel ta e sobrecarga: un colega ta bay y no ta reemplas’e; su trabou ta keda reparti entre esnan cu a keda. Otro vacatura ta disparce y mas peso ta cay riba e mesun empleadonan. E compania ta bira “mas productivo” pasobra menos hende ta haci mas trabou, pero e ganashi di e sobreesfuerso ey nunca ta yega den man di e trahado. Ora e peso subi y e pago keda mescos, e esfuerso no ta parce oportunidad mas; e ta sinti manera explotacion.

Aruba mester puntra directamente: cuanto empleado ta keda den un puesto solamente pasobra nan mester paga huur y cuminda? Cuanto lo cana bay mañan mes si nan haya un otro oportunidad?

Un persona por tin un empleo fiho, ricibi su salario tur fin di luna y toch biba completamente infeliz. Y si un parti grandi di nos forsa laboral ta odia dialuna mainta den silencio, esaki no ta djis un problema personal: e ta un crisis economico, un menasa pa productividad y un sla directo na e bienestar di nos isla.