Plastic ta tur caminda: den empake di cuminda, cos di hunga pa mucha, articulonan di cushina, paña, aparatonan electronico y sinfin di obheto cu nos ta uza tur dia. Sinembargo, un informe cientifico nobo ta lanta preguntanan serio riba loke e consumidor sa di e substancianan kimico den e productonan aki y cuanto di nan a wordo adecuadamente getest.

E investigacion titula Poison Plastics: How Chemicals in Everyday Plastics are Harming Your Health, dirigi pa e investigadora Naima Fenderl, a analisa e kimiconan presente den productonan comun di plastic y a revela un cantidad alarmante clasifica como sumamente peligroso pa salud humano.

Investigadornan a uza e database PlastChem, cu ta compila alrededor di 16,000 substancia kimico asocia cu produccion di plastic. Di e total aki, aproximadamente 4,200 a keda cataloga como substancianan di peliger halto (highly hazardous). Esaki ta representa mas di un kwart parti di e kimiconan identifica den e base di dato.

E preocupacion ta bira hopi mas grandi ora analisa productonan cu tin contacto directo cu e curpa:

• Casi 92% di e kimiconan identifica den plastic cu ta mishi directamente cu cuminda ta asocia cu substancianan di riesgo halto;
• Den cos di hunga di mucha, casi 89% di e substancianan detecta a keda clasifica den e categoria di riesgo halto aki;
• PFAS—conoci popularmente como “forever chemicals”—y bisfenolnan ta keda resalta pa nan relacion cu daño na organonan interno y otro problemanan severo di salud.

E raport ta resalta tambe un limitacion cientifico y legal grandi: casi 80% di e 3,552 kimiconan mas comunmente uza den plastic no tin suficiente informacion toxicologico disponibel. Cu otro palabra, cientificonan ainda no tin e datonan necesario pa determina cu precision ki efecto nan por tin riba termino largo.

Aki ta unda e bashi huridico y regulatorio ta cuminsa: bo no por prohibi un substancia facil si su peliger exacto no a keda legalmente comproba ainda, pero e falta di prueba tampoco ta un garantia cu e producto ta safe. Segun e raport, mas di mitar di e kimiconan clasifica como sumamente peligroso no ta regula ainda pa autoridadnan grandi manera Union Europeo.

Esaki no ta nifica cu tur producto di plastic ta inmediatamente venenoso. E grado di daño ta depende di e nivel di concentracion, e tipo di material, e temperatura y e duracion di exposicion. Pero e ta lanta un duda fundamental: con un consumidor por proteha su mes ora e fabricantenan mes no tin e obligacion di declara tur substancia cu nan ta uza den e formulacion di e plastic?

E discusion ta bay mas leu cu djis prohibi un solo componente of reemplasa un pochi. Plastic ta forma parti integral di bida moderno. E berdadero reto pa autoridadnan di salud ta pa identifica cua substancianan ta representa un peliger real, exigi transparencia total for di e industria y actua na tempo prome cu e consumidor keda exponi pa decadanan na productonan cu nunca a wordo corectamente controla.