Loke a pasa recientemente durante e apertura di e Campeonato Nacional di Domino 2025 na Aruba ta un momento di berguensa nacional. Minister Gerlien Croes a wordo ataca verbalmente na un manera grosero pa un homber cu di ningun manera a sa di comporta su mes. Segun un post emocional di Facebook di e ciodadano respeta Jan Poets, e homber a bin asina cerca di e minister cu nan cara casi a mishi cu otro, mientras cu e tabata papia cun’e na un tono agresivo.

E incidente por tabatin consecuencianan hopi leu si e fotografo di e minister no a interveni. El a actua corectamente door di mete pa descala e situacion. Loke a sigui tabata un intercambio di palabra entre e homber y e fotografo, y na bon ora tabatin hende presente cu a interveni pa yama e homber na ordo. Pero e situacion aki ta bay mas leu cu un anochi incomodo. E ta lanta preguntanan profundo tocante respet, siguridad, y kico nos como sociedad ta acepta.

Un homber cu ataca un hende muhe verbalmente of fisicamente, sigur den ehercicio di su funcion, ta un cobarde. Si ta trata di un minister cu ta haciendo su trabou pa e pais den funcion, nos ta papia di un atake directo riba e autoridad di nos democracia. Cu un hende no ta di acuerdo cu su vision politico naturalmente ta permiti den un sociedad liber, pero esey nunca mag degenera den intimidacion of atakenan personal.

Loke e situacion aki ta haci extra preocupante ta e riesgo di precedente. Si e comportacion aki no wordo atendi severamente, kico lo sigui? Nos lo bay permiti cu politiconan femenino manera Sra. Evelyn of Sra. Xiomara of Srta. Stephany riba caya, durante evento, of den parlamento mes wordo intimida of hasta ataca? Naturalmente cu no. Manera Jan Poets a declara corectamente: desacuerdo politico ta saludabel, pero agresion ta inaceptabel. Nos nunca mag normalisa esaki.

Lo wordo bisa cu e minister mester tabatin seguridad cu ne. Pero nos kier biba den un sociedad unda cada miembro di gobierno mester wordo vigila continuamente, puramente pa miedo di e tipo di comportacion aki? Esey ta e consecuencia di e clima politico cu nos ta permiti—un clima unda respet ta disparce y conflictonan ta termina den caos? Esaki ta loke ta pasa ora den parlamento nos ta prefera pleita en bes di colabora. Si e ehempel di ariba caba ta venenoso, kico nos por spera di e resto di e pais?

Tambe e organisacion di e evento, e bond di domino, tin responsabilidad den esaki. Unda e seguridad tabata? Dicon e directiva no a para firme tras di e minister, cu tabata presente riba invitacion? Ta tempo pa di nan banda bin medidanan cla y un excusa publico. Pasobra aunke nan no ta e agresor, nan si ta responsabel pa seguridad di nan huespednan.

Finalmente, e homber aki, cu a confronta e minister, no mag djis retira su mes den anonimidad. E mester pidi disculpa publicamente. Y si, si esey no sosode, polis mester wordo envolvi. No pasobra nos kier vengansa, sino pasobra nos ta exigi respet pa e funcion—pa democracia—y pa hende muhe cu ta para pa yuda Aruba bay dilanti. Laga esaki no bira e norma. Laga esaki ta e momento cu nos ta bisa: te aki y no mas!