Un grupo di 21 aerolinea Europeo grandi a priminti di stop di uza mercadeo ambiental cu ta duna pasahero e impresion cu un solo vuelo por ta completamente “CO₂‑neutral”, “sostenibel” of “berde” djis pa paga un suma extra of opta pa alternativa manera biocombustible (biofuels). E decision aki ta sigui un investigacion dirigi pa Union Europeo (EU) riba “greenwashing” den henter e industria di aviacion.
Entre e aerolineanan cu a firma e compromiso ta KLM Royal Dutch Airlines (Hulanda), Lufthansa (Alemania), Air France (Francia), easyJet (Reino Uni), Ryanair (Irlanda) y Luxair (Luxemburgo). E promesa conhunto a ser coordina pa e Comision Europeo y autoridadnan nacional di proteccion di consumidor, despues di un keho di e grupo di consumidor Europeo BEUC y su socionan na 2023.
E aerolineanan a compromete nan mes na e siguiente cambionan:
- Evita reclamonan vago manera “vuelo berde” of “biahe neutral den carbon” sin prueba of respaldo cientifico.
- Stop di implica cu emision di un vuelo specifico por ser compensa completamente door di pagonan voluntario of e uzo di Combustible Sostenibel pa Aviacion (SAF), cu ainda ta den fase tempran di disponibilidad.
- Clarifica e limitenan di programanan di compensacion di carbon (carbon offsetting) y sigura cu cualkier reclamo di sostenibilidad ta transparente y basa riba evidencia.
- Sigura honestidad den publicidad, specialmente ora ta promove “tarifa berde” of contribucionnan climatico opcional.
E Comision Europeo a spierta cu gaña consumidonan cu reclamonan ambiental sin base ta mina confiansa y ta stroba progreso real pa metanan climatico. “Biaheronan merece informacion cla y preciso, no triki di mercadeo,” un vocero di e Comision a bisa durante e anuncio.
KLM, cu anteriormente a ricibi ordo di un corte Hulandes pa ahusta su mercadeo di clima, awor a bay di acuerdo pa reforma su mensahe ambiental. Den un decision di 2024, e corte a haya cu 15 di e 19 reclamonan di sostenibilidad haci pa KLM tabata “vago y sin fundamento,” incluyendo terminonan manera “bula CO₂-neutral” y referencianan na proyectonan di reforestacion sin detaye.
Di mesun manera, Lufthansa y Ryanair a enfrenta scrutinio pa ofrece contribucionnan climatico opcional na momento di paga sin splica debidamente nan impacto limita riba emisionnan real. Segun defensornan di consumidor, e tacticanan aki ta crea un falso sentido di responsabilidad ambiental entre viaheronan y ta distorsiona e comprension publico di e berdadero ‘carbonfootprint’ di aviacion.
E compromisonan nobo ta afecta tambe aerolineanan di costo abao manera easyJet y Luxair, cu anteriormente a destaca schemanan di compensacion como parti di nan posicionamento “berde”. E Comision ta bisa cu e companianan aki awor mester revisa of elimina cualkier reclamo engañoso den publicidad tanto digital como offline.
Mientras cu gruponan ambiental a aplaudi e medida, nan a enfatisa e necesidad pa ehecucion. “Palabra ta solamente e prome paso,” un representante di BEUC a bisa. “Awor nos ta spera cu autoridadnan sigura cu e aerolineanan ta cumpli cu nan palabra.”
E acuerdo aki ta marca un cambio den con e industria di aviacion ta comunica su strategia di clima — y por tin efecto den debatenan mas amplio riba mercadeo berde den otro sectornan.
Consumidonan por spera mas transparencia di awor padilanti, pero bula di forma sostenibel ta keda un reto a largo plaso cu ningun slogan di mercadeo por resolve.






0 Comments