Bo a yega di pensa kico lo pasa si bo datonan personal wordo horta for di un negoshi cu bo ta confia?

Kisas bo a duna un compania bo cedula, adres, number di telefon, datonan bancario y comprobante di salario, asumiendo cu e informacion lo keda sigur pasobra e empresa ta parce profesional y confiabel. Pero kico ta pasa si hackernan drenta nan sistema?

Ken mester avisa bo? Ken ta paga si criminalnan uza bo informacion? E compania por keda castiga? Y, mas importante, e leynan actual na Aruba ta suficientemente fuerte?

E Peliger di e Era Digital y Fintech 

E preguntanan aki ta bira cada bes mas critico awor cu servicionan financiero ta move online. Aplicacionnan di fintech, digital wallets y plataformanan di pago digital ta haci transaccionnan mas lihe, pero nan ta compila cantidadnan enorme di informacion sensitivo.

Un kiebro di siguridad (data breach) por expone bo historia financiero y documentonan di identidad, lagando porta habri pa estafa, phishing convincente y fraude di identidad.

E Marco Legal na Aruba y su Gapnan 

E Ordenansa Nacional di Registracion di Persona (Landsverordening persoonsregistraties) na Aruba ta exigi pa organisacionnan tuma medidanan tecnico y organisatorio adecua pa proteha informacion contra perdida of acceso no autorisa. Violacion di e ley aki por resulta den un boet maximo di Afl. 10.000.

Sin embargo, e legislacion di Aruba no tin un obligacion general y stipula cu ta forsa cada compania pa notifica e cliente dentro di un tempo specifico despues di un kiebro di siguridad. Esaki ta lanta un duda grandi: Con lihe bo lo haya sa cu bo datonan a wordo horta?

Cada ora ta conta: e consumidor mester por cambia password, blokea carchi y alerta su banco. Si e empresa tarda pa revela e problema, e delincuentenan ta haya mas tempo mientras e cliente no sa mes di e peliger.

Confusion di Responsabilidad y Compensacion 

Ora algo bay robes, e negoshi por culpa e desaroyador di software, e compania di software ta culpa e plataforma di cloud, y e aplicacion ta tira falta riba e banco. E consumidor ta keda atrapa mey-mey purbando di haya sa ken ta responsabel.

Si placa wordo horta, entrega un keho na polis y Ministerio Publico ta esencial, pero un investigacion penal no ta garantisa cu bo ta haya bo placa bek. Banco Central di Aruba (CBA) ta supervisa institutonan financiero y ta alerta contra fraude digital, pero e consumidor no mester asumi cu cada app tin e mesun proteccion estricto cu un banco tradicional.

Un Yamada pa Modernisa nos Leynan 

Aruba mester di un discusion mas amplio:

• Mester obliga companianan pa notifica e publico di biaha ora tin un kiebro di siguridad?
• E boetnan mester ta mas halto ora negligencia expone miles di ciudadano?
• Mester pone e peso di prueba riba e compania pa demostra cu el a proteha e datonan, en bes di laga e consumidor bringa su so?

Confia den un negoshi no ta nifica asumi tur su riesgonan. Ora companianan ta saca probecho di nos datonan, nan mester carga e responsabilidad total pa proteha nan. Nos no mester warda te ora nos cuenta keda bashi pa drecha e sistema.