Ora cu Merca a invadi Irak na 2003, el a desmantela loke e tempo ey tabata un di e ehercitonan mas grandi di Medio Oriente. Mas di dos decada despues, tensionnan entre Washington y Caracas ta lanta e pregunta: si Merca invadi Venezuela na 2025, kico lo ta e resultado? E contesta ta cuminsa cu un comparacion directo di e poder di Irak e tempo ey y e postura di Venezuela awor.
Cantidad di Tropa
Na 2003, Irak tabatin aproximadamente 375.000 solda activo, ademas di e Guardia Republicano y reservanan cu a pusha e total di personal riba 600.000. E tabata un ehercito convencional na gran escala. Pa contraste, Venezuela tin awe mas o menos 150.000 personal activo, ademas di reservistanan y un forsa di milicia cu Maduro ta clama ta conta miyones di hende. Mientras cu e cifranan di Irak tabata hopi mas grandi cu esun di Venezuela, Caracas ta depende hopi riba mobilisacion paramilitar pa disuadi atake – menos profesional, mas simbolico.
Vehiculo Blinda y Armamento Pisa
E divisionnan blinda di Irak na 2003 tabata inclui entre 4.500 y 6.000 tanki y decenas di miles di piesa di artileria. E regimen di Saddam Hussein a inverti masivamente den poder di candela terestre, aunke hopi di e ekipo tabata anticua for di e era Sovietico. E arsenal di Venezuela ta modesto: mas o menos 200 tanki di bataya principal y rond di 600 vehiculo blinda, apoya pa artileria pero ni cerca di e escala di Irak. Den un confrontacion convencional cu forsanan mecanisa Mericano, Venezuela lo ta den un desventaha enorme.
Forsa Aereo y Defensa Aereo
Irak a drenta 2003 cu 180 avion di combate, aunke menos cu mitar tabata operacional. Saddam hasta a dera avion den desierto pa sconde nan, un medida cu ta mustra con debil su forsa aereo a bira. Sinembargo, e red di defensa aereo di Irak tabata inclui mas di 850 tirado di misil tera-pa-aire y 4.000 cañon antiaereo.
Venezuela, aunke mas chikito, probablemente tin un sistema di defensa aereo mas moderno awe. Su arsenal ta inclui sistemanan di misil traha na Rusia manera S-300V, Buk, y Tor, hunto cu mas o menos 79 avion di combate manera Sukhoi Su-30 y F-16nan bieu. Mientras cu e defensanan di Irak a cay den otro casi instantaneamente bou di e superioridad aereo Mericano, e sistemanan Ruso di Venezuela por complica operacionnan Mericano – pero no pa un tempo indefini.
E Resultado na Irak
A pesar di su tamaño, e ehercito di Irak a colapsa dentro di simannan despues di e invasion lidera pa Merca. Pa mei 2003, e ehercito di Saddam a desintegra, e regimen a cay, y e pais a drenta añanan di insurgencia y caos. E victoria lihe riba tereno di bataya a wordo sigui pa instabilidad a largo plaso – e subida di violencia sectario y, eventualmente, ISIS.
Kico por Spera na Venezuela
Si Merca lo a invadi Venezuela awe, e resultado riba e campo di bataya probablemente lo tabata lihe. E superioridad tecnologico di Merca y su dominio abrumador riba lama y den aire lo surpasa e defensanan di Venezuela. Sinembargo, mescos cu Irak, e berdadero peliger lo sinta den loke ta bini despues. Rednan di milicia, tacticanan di gueria urbano, y instabilidad regional por converti Venezuela den un zona di conflicto prolonga. Un invasion por tumba Maduro, pero e por desata tambe un caos den henter Caribe y e parti noord di Sur America, destabilisando un region cu ya caba ta carga cu un crisis migratorio y economico.






0 Comments