Entre e Promesa y e Muraya di Burocracia 

Oranjestad ta wordo presenta como un cuidad cu futuro. Maneho di gobierno ta papia di revitalisacion, inversion priva, edificionan renoba, negoshinan nobo y un centro historico mas bibo. E incentivonan fiscal introduci na 2026 ta specialmente diseña pa encurasha doñonan y inversionistanan pa renoba, bende y reactiva propiedadnan den curason di Oranjestad y San Nicolas.

Minister di Asuntonan Economico tambe tabata explicito tocante e rol di gobierno: crea e condicionnan adecua, kita bareranan innecesario y haci e proceso pa establece un negoshi mas cla, accesibel y eficiente.

Pesey tin un pregunta husto cu inbercionistanan, comerciantenan y residentenan tin derecho di haci: si esaki ta e vision, pakico e realidad riba tereno tin biaha ta mustra asina diferente?

Un inversionista ta hinca placa den un edificio. Ta regla financiamento. Ta diseña plannan. Kisas tin empleado reserva caba. E expectativa ta simpel: haya e permisonan necesario, cumpli cu e reglanan y habri porta. En bes di esey, inversionistanan por haya nan mes ta cana entre varios departamento, wardando riba decision, confrontando proceduranan poco cla of topando cu condicionnan fisico cu no ta cuadra cu e imagen di un capital revitalisa.

Esaki no ta un preocupacion teorico. Oranjestad Investment Group a expresa publicamente cu inversionistanan cu ya a compromete miyones ta birando frustra pa motibo di tardansa y falta di decision concreto di parti di gobierno. Segun e grupo, varios inversionista a cumpra propiedad, a sigura fondonan y a desaroya proyecto, pero ta keda para sin por avansa pa via di proceduranan tranca y incertidumbre regulatorio.

Na mes momento, cifranan oficial ta mustra cu actividad economico ta sigui cana. Aruba a otorga 242 permiso nobo di negoshi durante e prome seis lunanan di 2026, incluyendo seis negoshi nobo den centro di Oranjestad. Esey ta nifica cu e problema no ta cu “nada no ta pasando”. E dilema mas hundo ta si e aparato gubernamental ta move na e mesun velocidad cu e vision cu ta wordo bendi na inversionistanan.

Cualkier persona cu cana den e cuidad por nota e contradiccionnan:

• Bo no por bisa inversionistanan cu Oranjestad ta birando un destinacion atractivo, mientras sushi y espacionan publico neglisha ta keda visibel.
• Bo no por stimula inversion den edificionan comercial mientras e doñonan ta keda warda lunanan largo riba permiso pa por uza nan.
• Bo no por promove un cuidad amabel pa bishitante mientras structuranan temporal of containernan ta ocupa espacionan caminda peatonnan mester transita.

Ken ta coordinando henter e proyecto aki? Si un mandatario tin un vision cla pa Oranjestad, tur e departamentonan envolvi tin e mesun instruccion? Nan ta trahando riba e mesun kalender? Ken tin e autoridad pa kibra e trancamento entre permiso, infrastructura, limpiesa y comercio?

Inversionistanan no ta spera pa Aruba bira perfecto di awe pa mañan. Nan ta pidi claridad, reglanan stipula y decisionnan dentro di un tempo rasonabel. Si Aruba kier pa capital priva rescata Oranjestad, e problemanan mas simpel mester keda resolvi prome. Bo no por pidi un inversionista kere den e futuro di e cuidad si gobierno no por haci e presente funciona.