loader image

Instagram y Facebook Por Cambia Fundamentalmente door di Huicio Historico riba Siguridad Infantil

by | Aug 19, 2026 | Noticia Internacional | 0 comments

Meta ta enfrentando loke por bira e reto legal di mas grandi den historia di Instagram y Facebook, mientras un huicio federal historico ta determina si e compania conscientemente a diseña su plataformanan pa atrae, tene y saca ganashi financiero for di muchanan.

E huicio ta tuma luga na Oakland, California, basa riba un demanda haci na 2023 door di un coalicion bipartidista di fiscalnan general di varios estado. Binti-nuebe estado ta acusa Meta di a compila informacion personal di menor di 13 aña di forma ilegal (violando e ley conoci como COPPA), mientras cu estadonan manera California, Colorado, Kentucky y New Jersey ta lidera acusacionnan adicional tocante e diseño adictivo di e plataformanan y declaracionnan falso di siguridad.

Meta ta nenga e acusacionnan y ta afirma cu el a inverti sumamente hopi den sistemanan di supervision pa mayornan y den proteccion pa teenager.

Miyones den Boet y Cambionan Radical den Diseño 

E consecuencianan financiero por ta gigantesco. Segun calculonan, e boetnan proponi por alcansa te cu $1,4 triyon di dollar. Maske expertonan huridico ta considera e suma aki poco probabel, cualkier veredicto penal por bira un di esnan mas grandi den historia corporativo di Merca.

Sin embargo, e menasa di mas grandi pa Meta ta structural. E estadonan ta exigi orden huridico pa cambia e funcionnan primordial di e aplicacionnan:

  • Elimina e infinite scrolling y e reproduccion automatico di video pa menor di edad;
  • Sconde e conteo di likes y limita notificacionnan push;
  • Cambia e algoritmonan di recomendacion cu ta busca retencion compulsivo;
  • Introduci verificacion mas estricto di edad y permiso di mayor;
  • Elimina filtronan cu ta altera aspecto fisico y haci ahustenan den contenidonan temporario manera Instagram Stories.

E funcionnan aki ta e curason di e modelo comercial di Meta. Kita nan lo baha e tempo cu hobennan ta pasa riba e pantaya y, consecuentemente, baha e entradanan grandi di propaganda comercial.

Un Precedente cu Impacto Global 

E hues di Distrito Yvonne Gonzalez Rogers lo dicidi e caso, caminda ta spera testimonio di Mark Zuckerberg y hefe di Instagram, Adam Mosseri. E huicio aki ta bini poco despues di un golpi pisa pa Meta na New Mexico, caminda un corte a impone penalidadnan di $942 miyon pa violacionnan di ley di proteccion di consumidor.

Contrario na New Mexico, e huicio na California ta envolve estadonan cu ta representa un porcentahe grandi di e poblacion mericano. Si e estadonan gana, pa Meta lo ta tecnicamente y comercialmente imposibel pa crea un version diferente di su rednan pa cada estado, locual por forsa un rediseño total na Merca y posibelmente na resto di mundo.

E veredicto final lo no elimina e funcionnan aki di un dia pa otro, pero e caso aki ta pone e structura mes di rednan social moderno den scochi di husticia: demostrando si pa proteha muchanan mester rediseña henter e mundo digital caminda nan ta pasa gran parti di nan bida.

0 Comments

Submit a Comment

Your email address will not be published. Required fields are marked *

Download of lesa e ultimo corant publica.

Categoria Noticia Busca Archivo Modo

Categorias

Busca Articulo

Enable Notifications OK No thanks