DIAMARS 17 di September proximo, lo ta selebra na Hulanda e asina yama ‘Prinsjesdag’ caminda Su Alteza Real, Rey Willem-Alexander, lo dirigi su mes na Parlamento General di e pais, den su “troonrede” vociferando e maneho di gobierno Hulandes p’e proximo aña Parlamentario.

Ya caba algun parti di e presupuesto 2024 ta conoci y loke a resalta sin duda, ta e hecho cu gobierno a dicidi di inverti 2.4 miljard euro den su defensa y den e proceso aki, tambe lo inverti den defensa militar p’e parti di Caribe Hulandes.

Esaki prensa Hulandes a publica den curso di ayera, mustrando cu Minister di Defensa, Ruben Brekelmans hunto cu Secretario di Estado pa Defensa, Gijs Tuinman, a presenta nan presupuesto cu ta carga nomber di “Defensienota 2024: Sterk, slim en samen.” E nota ta atende reto grandi cu Hulanda tin n’e momentonan aki pa loke ta agresion militar, indicando e situacion cu tin na Rusia y loke esaki ta nifica pa henter Europa, pero na mes momento e nota tambe ta atende e situacion cu den e sector di Caribe Hulandes.

Entre otro, e nota ta mustra cu den caso di un conflicto militar caminda tanto Hulanda como e parti Caribense di Reino Hulandes, dor di atakenan hibrido y fisico, defensa di e islanan mester ta den un miho posicion pa hunto cu gobiernonan coordina tur esfuerso pa proteha e islanan aki den e miho forma posibel.

Den e nota, gobierno Hulandes ta mustra riba e situacion den Caribe caminda e situacion di instabilidad na Venezuela ta sigui surgi cu situacionnan cu no por wordo anticipa y cu ta forma un peliger pa siguridad di e islanan, esta Aruba, Korsou y Boneiru en particular, ta pone cu mester reforsa e presencia militar den e region aki.

Na mes momento, gobierno ta mustra den e nota tambe cu fuera di e situacion di instabilidad, tambe henter Reino y e islanan den Caribe, ta confrontando situacionnan cu ta ser afecta pa crimen organisá y tambe un influencia for di China y Rusia den e region di Caribe. Gobierno ta mustra den su nota, cu lo reforsa loke ta Carmil, esta Caribische Milities cu na Aruba ta conoci tambe como Arumil, Arubaanse Milities, pa asina e islanan aki ta miho prepara pa cualkier eventualidad.

E nota no ta specifica ainda cuanto di e 2.4 miljard lo wordo inverti den e cuerpo militar na Aruba y e otro islanan, pero aki por anticipa cu lo por tin mas presencia di militarnan Hulandes riba e islanan den proximo lunanan. Un cambio di 180 grado compara cu algun aña atras ora cu gobierno Hulandes hasta kier a elimina loke ta conoci como Mariniers Kazerne Savaneta, pero cu esfuerso di gobierno di e tempo ey, a logra di convence Hulanda di e importancia di presencia di e sector militar aki na Aruba.