Mexico a lansa un demanda formal contra Google pa su decision controversial di cambia e nomber di e “Golfo di Mexico” pa e “Golfo di America” riba Google Maps pa usuarionan den Merca. E cambio, cu ta alinea cu un directiva emiti pa e presidente Donald Trump, a lanta un disputa internacional riba e nomber di un di e awanan mas importante di mundo.  

E presidente Mexicano Claudia Sheinbaum a anuncia e accion legal den un declaracion na television, yamando e cambio di nomber “un violacion di normanan internacional y un distorsion di realidad geografico.” Segun Sheinbaum, e nomber di e Golfo a wordo reconoci globalmente como e Golfo di Mexico pa mas di cuater siglo y ta refleha e contribucionnan historico y teritorial di Mexico, cu ta controla casi mitar di su awanan.  

“Merca tin e derecho di yama su propio partinan di e golfo loke e kier internamente, pero altera e label na un manera cu ta afecta usuarionan internacional y ta mina soberania comparti ta inaceptabel,” Sheinbaum a declara.

E cambio di nomber a wordo introduci riba Google Maps despues di un decreto ehecutivo firma pa Trump aña pasa, cu a conduci na e Congreso Mericano aprobando e “Ley di Golfo di America.” E legislacion aki a rekeri tur agencia federal pa adopta e nomber nobo ora di referi na e cuerpo di awa domesticamente. Google, citando su politica di respeta preferencianan di nomber regional, a actualisa e label di mapa pa “Golfo di America” den teritorio Mericano.

Sinembargo, e cambio ta aplica tambe na un zona maritimo comparti—49% controla pa Mexico, 46% pa Merca y 5% pa Cuba—lantando preocupacion tocante un sobrepaso unilateral. E Ministerio di Relacionnan Exterior di Mexico previamente a emiti peticionnan formal na Google pidiendo nan reconsidera, pero e compania di tecnologia a nenga.

Cris Turner, Vice Presidente di Asuntonan Gubernamental di Google, a defende e decision, bisando, “Nos ta localisa nombernan pa refleha uzo regional. Na Merca, gobierno awor oficialmente ta referi na dje como e Golfo di America. Esey ta loke usuarionan ta mira riba nos plataforma.”

Google ta mantene cu usuarionan pafo di Merca ainda ta mira e nomber “Golfo di Mexico,” y den zonanan neutral e mapa awor ta mustra ambos label, dependiendo di e configuracion y ubicacion di e usuario.

E situacion a escala mas leu cu protestanan diplomatico. E demanda di Mexico, entrega na un tribunal internacional, ta afirma cu e accion di Google ta viola normanan estableci pa e Grupo di Expertonan di Nacionnan Uni riba Nombernan Geografico (UNGEGN), cu ta enfatisa consenso y contexto historico den nombramento di lugar.

Presidente Sheinbaum tambe a tira un remarca na Merca door di propone den forma di chiste e nomber “Mexico America” pa Merca, un referencia dirigi na mapanan historico y historia regional.

E caso a lanta combersacionnan mas amplio tocante e poder di plataformanan di tecnologia den forma e comprension publico di geografia. Criticonan ta argumenta cu companianan priva no mester ta arbitrando disputanan internacional di nombramento, specialmente ora decisionnan ta wordo influencia pa mandatonan politico.

Mientras e demanda ta sigui, probablemente e lo establece un precedente pa con plataformanan di mapanan digital ta atende caracteristicanan geografico comparti den un mundo politicamente dividi.