Un Futuro Mas Inteligente pa Agricultura y Rescate di Bestia

Aruba ta papiando seriamente awor riba siguridad alimentario y desaroyo di agricultura local. Gobierno a anuncia e transformacion di Cunucu Butucu como un Area di Produccion Agricola Strategico, brindando tereno pa cunukeronan y criadornan di bestia, infrastructura di awa, energia renobabel, instalacionnan pa procesa producto y miho acceso na mercado.

Sinembargo, si Aruba kier lanta un sector agricola fuerte di berdad, mester atende tambe un di e problemanan practico cu por stroba e progreso aki: e conflicto creciente entre bestia di cria, cacho riba caya y e scarsedad di espacio apropia pa e fundacionnan di bienestar animal.

Aki ta unda un otro inversion grandi di gobierno por forma parti di e solucion integral: e infrastructura nobo di bienestar y control animal na Kibaima.

E Centro di Bienestar Animal nobo aki a wordo diseña pa expande severamente e capacidad di e isla pa atende cacho, pushi y otro mascotanan, cu capacidad pa te cu 80 cacho y 40 pushi, banda di instalacionnan pa cuarentena y un clinica veterinario moderno. Esaki ta lanta un pregunta interesante di planificacion teritorial: si Aruba ta construyendo un centro avansa na Kibaima, no ta momento pa evalua si terenonan bisiña por brinda espacio adecua pa e fundacionnan cu ta carga e peso di e trabou di rescate?

Esaki no ta nifica kita of culpa ningun organisacion, sino pensa riba uzo di tereno di un forma mas amplio.

Actualmente, un di e fundacionnan di rescate di mas grandi ta ubica den e zona di Butucu. E organisacion ta haci un trabou ehemplar, pero su cercania na actividadnan di cunucu ta keda un punto di preocupacion legitimo pa e criadornan di bestia ora cacho drenta e terenonan y ataca nan cabritonan. Ta bon pa aclaria cu e fundacion no ta responsabel pa e hendenan iresponsabel cu ta tira cacho afo den e area; e fundacion simplemente ta esun cu ta keda cu e dolor di cabes pa yuda nan.

En bes di forsa agricultura y rescate di animal pa comparti un espacio cu ta crea tension innecesario, gobierno por uza e planificacion di Cunucu Butucu pa ofrece un oportunidad strategico: ubica e fundacion riba un tereno mas grandi y apropia na Kibaima, pega cu e facilidad estatal nobo.

Un paso asina no mester wordo mira como un mudansa pa castiga e fundacion, sino net lo contrario: como un inversion grandi den su futuro. Un tereno nobo lo permiti un cura miho cera, distancia sigur for di criaderonan di cabrito, espacionan amplio pa cuarentena y rehabilitacion, y un cooperacion directo cu e veterinarionan y oficialnan di control animal.

Pa e cunukeronan, e bentaha ta directo: tereno agricola ta keda destina exclusivamente pa cuminda y cria, mientras e trabou di rescate ta haya un instalacion profesional adapta na su necesidadnan.

Aruba mester di mas cuminda local, e cunukeronan mester di proteccion pa nan cria, y e fundacionnan mester di espacio digno. Cu e inversionnan cu ya ta tumando luga na Kibaima, e opcion mas sabi no ta traha e proyectonan aki separa, sino uni e piesanan hunto pa duna tanto agricultura como bienestar animal e tereno cu nan merece.