Den bida nos ta wordo confronta cu situacionnan cu ta surpasa nos comprondemento. Nos ta experencia perdida, incertidumbre, presion financiero, problemanan relacional of enfermedad. Ta den e momentonan ey nos hopi biaha ta inclina na duda: Dios realmente lo interveni? E ta scucha mi oracion? Esaki ainda por drecha? Pero Fe berdadero ta yama nos na un actitud diferente — no di incertidumbre, sino di entrega y confiansa completo.

Bijbel no ta laga espacio pa un Fe cu ta tambalea. Santiago 1:6-8 (NBV21) ta bis’e skerpi y cla:

“Pero ora boso pidi, boso mester haci esaki cu Fe, sin duda. Pasobra esun cu ta duda ta manera un ola di lama, cu biento ta move di un banda pa otro. Un hende asina cu ta indeciso, ta instabil den tur aspecto di su bida. Un hende asina no mester pensa cu e lo ricibi algo di Señor.”

E texto aki ta mustra cu Fe no ta laga espacio pa duda. Duda ta haci bo instabil, ta influencia bo pensamento, bo decisionnan y finalmente bo actitud di bida. Esun cu ta duda, ta biba cu un pia riba e promesa y un pia den miedo. Pero esun cu realmente ta kere den Dios, ta laga bay — no pa debilidad, sino pa siguridad cu Dios ta actua.

Hesus mes a critica su discipelnan ora nan tabata duda. Den Mateo 14:31, ora Pedro a cuminsa sink riba awa, Hesus a bisa:

“Homber di poco Fe, pakico bo a duda?”

No pasobra Hesus no tabatin comprondemento, sino pasobra E sa kico Fe por haci: Fe por move seronan (Mateo 17:20). Ora bo resa, bo mester kere cu Dios ya caba ta reglando esaki. Fe ta mira e cumplimento prome cu e ta visibel.

Ora nos entrega nos preocupacionnan y necesidadnan den oracion na Dios, nos no ta haci esaki cu un expectativa di “kisas”. No, nos ta resa pasobra nos sa: Dios ta scucha, Dios ta mira, y Dios lo provee. Manera ta scirbi den Filipensenan 4:6-7:

“No preocupa boso mes cu nada, pero den tur cos haci boso peticionnan conoci na Dios den oracion y suplica cu gradicimento. Y e paz di Dios, cu ta surpasa tur comprondemento, lo warda boso curason y boso mente den Cristo Hesus.”

E paz aki ta bin solamente ora nos entrega esaki realmente. Ora bo resa y despues sigui preocupa, bo no a laga bay ainda. Entrega ta nifica: mi a pone esaki den man di Dios y mi ta sigui. Bo actuacion ta cambia, bo actitud ta cambia, pasobra bo confiansa den Dios ta bo anker.

Esaki no ta nifica cu tur cos semper lo bay exactamente manera nos kier, pero si cu Dios nunca lo faya den loke ta bon y necesario. E ta Jehova Jireh – e Dios cu ta provee. Y esun cu busca E cu un curason sincero, no lo keda desapunta.

P’esei, no laga duda tuma lugar den bo bida di Fe. Fe no ta duda. Fe ta confia. Resa, confia y sigui cana cu e siguridad cu Dios ya caba ta trahando, hasta si bo no ta mir’e ainda. Bo a entreg’e — pues lag’e keda ey tambe. Pasobra Esun cu a priminti, ta fiel.

“Sin Fe ta imposibel agrada Dios…” (Hebreonan 11:6)

Fe no ta un sentimento. Fe ta un escogencia. Y e escogencia ey ta bisa cada dia di nobo: Mi Dios lo provee.