loader image

Farandula: Weeknummer. 41

by | Oct 9, 2025 | Farandula | 0 comments

Taylor Swift Ta Reacciona Riba Critica di ‘The Life of a Showgirl’: ‘Mi No Ta Polis di Arte’

Taylor Swift a reacciona riba e reaccionnan mixto pa su album nobo The Life of a Showgirl, cu, apesar di a kibra recordnan di ‘streaming’, a dividi critico y fanatico. Algun ta argumenta cu e album no tin profundidad emocional y no ta conecta cu e trendnan actual di pop. Papiando cu Apple Music dia 7 di october, Swift a bisa cu e ta yama bonbini na opinionnan diverso: “Si bo ta menciona mi nomber of e titulo di e album durante e siman di lansamento, bo ta yudando. Mi no ta polis di arte—tur hende por sinti loke nan kier.”

E cantante a enfatisa cu no tur oyente lo por conecta cu su cancionnan, describiendo musica como “un manera intenso di mira bo mes.” Orguyoso di su di diesdos album di studio, Swift a splica cu el a enfoca riba legado y honestidad artistico. E album, inspira parcialmente pa su relacion cu e strea di NFL Travis Kelce, ta reuni’e cu e productornan Max Martin y Shellback, bolbiendo na e zonido di pop alegre di e cuminsamento di su carera, mientras e ta celebra bida tras di cortina.

____________________________________________________________________________

Famia di Dolly Parton Ta Pidi Fanaticonan pa Resa pa Salud di e Cantante

Preocupacion a crece pa e salud di e legendario cantante di country Dolly Parton despues cu su ruman muhe, Freida, a pidi fanaticonan pa resa pa su recuperacion. Den un post riba Facebook dia 7 di october, Freida a revela cu Parton no tabata sinti bon y a urgi “guerreronan di oracion” pa apoy’e, enfatisando su fe den e poder di oracion. E post a ricibi miles di comentario, incluyendo fanaticonan cu a ofrece donacion di organo.

Despues, Freida a aclaria cu e no tabatin intencion di causa alarma, splicando cu Dolly tabata solamente “un tiki indispuesto.” E cantante di 79 aña recientemente a pospone seis concierto programa na Las Vegas te cu september 2026, citando proceduranan medico cu ta rekeri sosiego y recuperacion.

Parton tambe a anuncia cu e no lo por asisti na e Governors Awards na november, unda e tabata programa pa ricibi un Oscar honorario. Apesar di su retonan di salud, e cantante di “Jolene” a sigura fanaticonan cu e no ta retira y cu e ta planea di bolbe “mas fuerte cu nunca.”

____________________________________________________________________________

Guns N’ Roses Ta Honra Ozzy Osbourne y Ta Canta pa Palestina den un Concierto Poderoso na Bogota

Guns N’ Roses a duna un concierto electrisante diamars na Bogotá, celebrando casi cuater decada di historia di rock. Actuando pa tres ora na e ‘venue’ Vive Claro, e banda a emociona e fanaticonan cu clasiconan manera “Welcome to the Jungle,” “Don’t Cry,” y “Sweet Child o’ Mine.”

Un di e momentonan culminante di e anochi tabata un tributo sincero na e rockero Britanico defunto Ozzy Osbourne, unda Axl Rose y Slash a interpreta “Never Say Die” y “Sabbath Bloody Sabbath.” E multitud a explota den aplauso pa e homenahe conmovedor.

E momento mas emocional di e concierto a yega ora e banda a toca “Civil War.” Despues di e actuacion, Rose a hisa un bandera Palestino cu e texto “Mi no mester di boso genocidio,” expresando solidaridad cu victimanan di guera. E gesto a ricibi aclamacion di e publico.

Guns N’ Roses a cera e show cu “Paradise City,” finalisando un anochi cu a combina musica, recuerdo y un mensahe di paz.

____________________________________________________________________________

Billboard Ta Nombra Bad Bunny e Artista Latino di Mas Grandi di Siglo 21

E superstrea Puertorriqueño Bad Bunny a wordo nombra e artista latino di mas grandi di siglo 21 pa Billboard. E revista a basa su ranking riba actuacion den e listanan di “Top Latin Albums” y “Hot Latin Songs” for di aña 2000 te cu 2024.

Billboard a elogia Benito Antonio Martínez Ocasio pa a “redefini musica latino” y pa mantene “un control inigualabel riba su trayecto artistico.” For di su prome entrada den e listanan na 2018, Bad Bunny a logra 14 hit #1 riba e lista di “Hot Latin Songs” y ocho album #1, mientras e tin un record di 89 cancion den e Top 10 di e lista—mas cu e dobel di esnan di Enrique Iglesias of Luis Miguel.

Su album YHLQMDLG a pasa un record di 70 siman na #1, y su exito na 2022 a haci’e e artista ‘top’ general di Billboard den tur genero. Recientemente, su ‘residency’ di 31 anochi na Puerto Rico y su proximo presentacion na e ‘halftime show’ di Super Bowl 2026 a cementa su influencia mundial.

____________________________________________________________________________

Gloria Estefan Ta Celebra Herencia Hispano cu un Mensahe di Union na Madrid

E cantante Cubano-Mericano Gloria Estefan a converti Plaza de Colón di Madrid den un celebracion vibrante di cultura Hispano diadomingo, marcando su carera di 50 aña cu un concierto gratis como parti di e festividadnan di Hispanidad 2025. Miles di fanatico a zwaai bandera di henter Latino America y Spaña mientras Estefan tabata interpreta su hitnan mas grandi, incluyendo “Oye mi canto,” “Hoy,” y “Con los años que me quedan.”

Acompaña riba escenario pa su casa Emilio Estefan, su yiu muhe Emily, y e artista Argentino Nathy Peluso, e presentacion a mescla generacion y estilo, uniendo ritmo latino clasico cu zonidonan moderno. E duo cu Peluso riba “Chirriqui Chirri” a ricibi un reaccion fuerte di e multitud.

E concierto a clausura cu “Cuba Libre,” un tributo na e raiznan di Estefan y na e historia comparti di e nacionnan di habla Spaño. E evento, cu a conta cu presencia di e presidente regional di Madrid, Isabel Díaz Ayuso, a encarna e tema di e festival: “Tur acento Spaño ta pas na Madrid.”

____________________________________________________________________________

Apple TV+ Ta Rebiba Specialnan Clasico di Peanuts pa e di 75 Aniversario di e Comic

E tan stima ‘comic strip’ Peanuts, cu Snoopy y Charlie Brown como protagonista, ta celebra su di 75 aniversario e aña aki, y Apple TV+ ta marcando e logro aki door di rebiba e specialnan anima mas iconico di e frankisia. E plataforma di ‘streaming’ lo ofrece periodonan gratis pa wak clasiconan di temporada manera It’s the Great Pumpkin, Charlie Brown, A Charlie Brown Thanksgiving, y A Charlie Brown Christmas.

Crea pa Charles M. Schulz na 1947, Peanuts a debuta den sindicacion na 1950 y a sigui pa aparece den mas cu 2,600 corant rond di 75 pais. Su mescla di humor y profundidad emocional a haci’e un di e ‘comic strip’-nan mas influyente na mundo.

Apple TV+, cu tin e derechonan di Peanuts desde 2020, a extende su partnership cu e famia Schulz te cu 2030 pa produci serie anima nobo y un pelicula. E aventuranan duradero di Charlie Brown, Snoopy y nan amigonan ta sigui inspira generacionnan rond mundo.

____________________________________________________________________________

Pinturanan di Bob Ross Lo Ser Vende na Subasta pa Apoya Television Publico Despues di Cortenan di Fondo

Trinta pintura original di e tan stima artista Bob Ross lo ser bendi na subasta pa recauda fondo pa stacionnan di television publico Mericano cu ta luchando despues di cortenan di fondo federal recien. E defunto presentador di The Joy of Painting, conoci pa su bos trankil y su “palonan chikito feliz,” a bira un simbolo di educacion di arte acesibel na television publico durante añanan ’80 y ’90.

Bonhams lo cuminsa cu e subastanan dia 11 di november na Los Angeles, sigui pa bentanan na London, New York, Boston y online. E ganashi lo bay pa stacionnan cu ta transmiti programanan di American Public Television, incluyendo The Best of Joy of Painting y This Old House.

E movecion ta sigui e eliminacion di $1.1 biyon den fondo pa television publico, aproba pa Congreso riba peticion di Presidente Donald Trump. Ross, cu a fayece na 1995, a pinta mayoria di e obranan cu ta bay den subasta en bibo durante transmision, cu un balor estima total di te na $1.4 miyon.

____________________________________________________________________________

Dua Lipa Ta Cende Los Angeles cu un Show Spectacular di su Tour ‘Radical Optimism’

Dua Lipa a transforma e Kia Forum di Los Angeles den un fiesta di baile deslumbrante durante e prome di cuater show ‘sold-out’ di su tour mundial Radical Optimism. E strea di pop di 30 aña a duna un presentacion di dos ora, mesclando coreografia yen di energia, efectonan visual briyante y un serie di su hitnan mas grandi, for di “Levitating” te na “Break My Heart.”

Demostrando confiansa y control, Lipa a cautiva e multitud cu cinco cambio di paña, efecto di laser, y un escenario diseña pa parce olanan di lama, reflehando e estetica di su album. Momentonan culminante a inclui su presentacion ardiente di “Love Again” y un demostracion vocal impresionante durante “Falling Forever.”

Criticonan a elogia e crecemento di Lipa como un artista en bibo desde su prome dianan, remarcando su mescla facil di pop inspira pa disco cu un toke moderno. E concierto a afirma su luga entre e artistanan di pop principal di awe, probando cu Radical Optimism ta mas cu un continuacion—e ta un declaracion di dominio artistico y un presencia radiante riba escenario.

____________________________________________________________________________

Shakira Ta Celebra 30 Aña di ‘Pies Descalzos,’ e Album cu A Lans’é na Fama Mundial

Trinta aña pasa, dia 6 di october 1995, e cantante Colombiano Shakira a lansa Pies Descalzos, e album cu a catapult’é na fama internacional y a defini’e como un di e bosnan mas original di musica latino. Graba entre Bogotá y Miami, e album a mescla pop-rock cu influencianan latino y a marca un punto di cambio den e escena musical di Colombia, birando e prome album di e pais cu a bende mas cu un miyon copia.

Cu hitnan manera “Estoy Aquí,” “Antología,” y “Dónde Estás Corazón,” e album a demostra e profundidad di Shakira como compositor y artista. Pies Descalzos desde e tempo ey a wordo certifica shete biaha cu diamanta y dos biaha cu platino, cu mas cu 4.3 miyon copia bendi rond mundo, haciendo’e e di tres album mas bendi di su carera.

Pa marca e logro aki, Shakira lo reanuda su tour Las Mujeres Ya No Lloran na Colombia, actuando na Cali dia 25 di october y na Bogotá dia 1 di november, continuando su legado duradero den pop latino.

0 Comments

Submit a Comment

Your email address will not be published. Required fields are marked *

Download of lesa e ultimo corant publica.

Categoria Noticia Busca Archivo Modo

Categorias

Busca Articulo

Enable Notifications OK No thanks