Taylor Swift Ta Hasi Historia Como e Artista Mas Galardona den e MTV VMAs
Taylor Swift a bira e artista mas premia den historia di e MTV Video Music Awards (VMAs) despues di a alcansa un total record di 31 trofeo. E strea Mericano tabata empata anteriormente cu Beyoncé na 30 premio, pero el a kibra e marca door di ricibi e distincion special di Director Artistico pa su trabou tras di camara.
Swift a gana tambe e premio pa Video of the Year pa su tema “The Fate of Ophelia”, reconocemento cu el a dedica na e leyenda di musica country Dolly Parton. Ademas, durante e evento el a estrena e video musical di su single nobo, “Patient Zero”, protagonisa pa Colin Farrell y Dakota Johnson.
Aunke Swift a domina e anochi, e premio maximo di Artist of the Year a bay pa Madonna, kende a habri e gala cu un presentacion hunto cu Sabrina Carpenter y Charli XCX. Di otro banda, e legendario banda Nirvana a keda honra cu e prestigioso Video Vanguard Award. E ceremonia a wordo anima pa Snoop Dogg.
____________________________________________________________________________
Stevie Wonder Ta Celebra 50 Aña di Songs in the Key of Life cu 4 Cantica Inedito
Pa conmemora e di 50 aniversario di su legendario album Songs in the Key of Life publica na 1976, e musico Mericano Stevie Wonder a lansa un mini-album special cu cuater cancion inedito: “It’s Easier”, “My Life Story of Love”, “I Can See the Sun In Late December” y “I’m Into Livin”. E temanan aki, skirbi y produci pa e artista mes, a keda graba durante e sesionnan original di e disco.
E cancionnan a keda scogi personalmente pa Wonder y mescla pa e ingenieronan original John Fischbach y Gary Adante. E lansamento a tuma luga exactamente na e mesun ora cu cinco decada pasa a finalisa e ultimo sesion di grabacion.
E produccion historico aki a duna Wonder su di tres premio Grammy pa Album of the Year, a ricibi certificacion di diamante y ta preserva den e prestigioso National Recording Registry di Merca.
____________________________________________________________________________
Amazon Music Ta Transmiti Concierto di Shakira na Madrid y Lansa Iniciativa pa Hende Muhe
Shakira y Amazon Music a anuncia e transmision en bibo y gratis di su concierto completo na Madrid diasabra awor, marcando e final di su gira mundial Las mujeres ya no lloran World Tour. E evento lo ta disponibel riba plataformanan di Amazon Music sin mester di subscripcion.
Ademas di e transmision, e artista Colombiano y e compania a lansa un iniciativa global pa capacita un miyon di hende muhe den inteligencia artificial (IA) y tecnologia pa aña 2028, den colaboracion cu Laboratoria y Amazon Web Services (AWS). E programa lo cuminsa na Colombia cu studiantenan y mamannan di Fundacion Pies Descalzos.
Tambe lo habri e tienda virtual Las mujeres facturan pa benta di productonan di emprendedoranan Latino, y lo lansa un edicion special den vinil pa e 25 aniversario di e album Laundry Service, hunto cu un version nobo di “Dai Dai”.
____________________________________________________________________________
Céline Dion Ta Revela Su Rutina di Entrenamento pa Por a Bolbe Riba Escenario
Céline Dion, e interprete conoci di “My Heart Will Go On”, a logra un regreso sumamente spera na e escenarionan cu su residencia Céline Dion Paris 2026 na Paris La Défense Arena. Inicialmente e cantante di 58 aña di edad tabatin 16 concierto programa pa e aña aki, pero debi na e demanda halto el a agrega dies fecha adicional pa mei 2027.
Na 2022, Dion a keda diagnostica cu e sindrome di persona rigido (stiff-person syndrome), un condicion neurologico raro cu a fors’e na suspende su presentacionnan en bibo. Su participacion na apertura di e Weganan Olimpico di Paris 2024 cantando “Hymne à l’amour” a marca e prome paso di su recuperacion.
Den un entrevista recien, e cantante Canades a detaya cu el a sigui un regimen estricto cu terapia vocal, fisioterapia, sesionnan di 90 minuut di pilates tres biaha pa siman y lesnan di ballet pa recupera su forsa y mobilidad.
____________________________________________________________________________
E Reestreno di Avengers: Endgame cu Minuutnan Adicional Ta Encabesa e Box Office
E pelicula Avengers: Endgame, e di dos produccion mas exitoso den historia di cine, a bolbe demostra su gran poder di atraccion liderando e box office mundial cu un recaudacion di 86 miyon dollar durante e fin di siman tras di su reestreno. E cinta aki a genera originalmente 2.885 miyon dollar na aña 2019.
Titulá Avengers Endgame: Bonus, e version nobo aki ta inclui cuater minuut adicional reparti den cuater escena nobo cu ta sirbi pa conecta e sucesonan di e pelicula cu e historia di Avengers: Doomsday, cual lo yega na e centronan di cine dia 18 di december. Entre e imagennan aki ta destaca e regreso spera di Robert Downey Jr. na e frankicia, e biaha aki den e papel di Dr. Doom.
Den e careda di box office na Merca, e pelicula nobo di e saga di Resident Evil a keda na di dos luga cu 23,3 miyon dollar, sigui pa Heart of the Beast protagonisa pa Brad Pitt cu 20 miyon dollar.
____________________________________________________________________________
E Prome Pelicula di ‘Game of Thrones’ Tin Fecha di Estreno: Tur Cos Riba ‘Aegon’s Conquest ’
Warner Bros. Pictures a anuncia oficialmente cu e prome pelicula deriva di e universo di Game of Thrones lo yega na e pantayanan grandi dia 1 di juni di 2029. E produccion cinematografico aki lo conta cu direccion di Owen Harris y guion di Beau Willimon.
E storia lo concentra riba e origen di e poder di e dinastia Targaryen na Westeros y e campaña militar di Aegon I Targaryen, kende a unifica e Shete Reinonan cu sosten di su dragonnan y a manda traha e legendario Iron Throne cu e spadanan di su enemigonan derota. Hunto cun’e tabata su rumannan y esposanan, Visenya y Rhaenys, montando riba e bestianan Balerion, Vhagar y Meraxes.
E pelicula aki ta completa e calendario di proyectonan di HBO, cu tin programa e di dos temporada di A Knight of the Seven Kingdoms pa 2027 y e di cuater y ultimo temporada di House of the Dragon pa 2028.
____________________________________________________________________________
‘Take Charge of My Heart’: E Kdrama Romantico Nobo cu Ta Yega na Netflix cu Chae Soo-bin
Netflix ta preparando e estreno di Take Charge of My Heart, un comedia romantico Coreano protagonisa pa Chae Soo-bin y Kim Young-kwang. E serie ta conta e storia singular entre un muhe cu por genera coriente y un empresario cu tin un curason artificial cu mester di wordo recarga.
E trama ta sigui Na Bo-bae, un escritor cu a haya podernan di electricidad despues di wordo alcansa pa un lamper den su infancia. Su bida solitario ta cambia ora e conoce Baek Ho-rang, kende ta biba cu un curason artificial cu ta kedando sin bateria. Despues di descubri cu e curason ta recarga cerca di Bo-bae, nan dos ta firma un contract di tres luna pa yuda otro.
E produccion, dirigi pa Park Soo-won, lo estrena diabierna 9 di october di 2026 cu dies episodio disponibel mesora.
____________________________________________________________________________
Karol G Ta Kibra Record Como e Artista Latina Mas Bendi den Historia di Merca
E cantante Colombiano Karol G a haci historia atrobe door di bira e artista femenino Latino cu e gira mas bendi den historia di Merca cu su tour Viajando por el mundo Tropitour. Segun datonan publica pa Touring Data, e artista a acumula mas di 160 miyon dollar den entrada durante su prome 17 presentacionnan na stadionnan Mericano, superando su propio record anterior di 138 miyon dollar di e Mañana será bonito Tour.
Entre e puntonan culminante ta destaca su concierto di 18 di september na MetLife Stadium, unda el a genera 12.9 miyon dollar den un solo anochi dilanti mas di 53 mil fanatico, registrando e concierto individual cu mas recaudacion pa un artista Latina.
Su exito ta resona tambe den e hitparadenan internacional: su colaboracion “BbY WOW” hunto cu Judeline y rusowsky a alcansa e di seis luga den e Billboard Hot 100, logrando e posicion mas halto di su carera.
____________________________________________________________________________
El Binomio de Oro de América Ta Celebra 50 Aña di Trayectoria cu e Disco Nobo ‘Vamos que vamos’
E legendario agrupacion vallenato El Binomio de Oro de América ta conmemora su di 50 aniversario cu e lansamento oficial di su album nobo titula Vamos que vamos, marcando su regreso despues di shete aña sin produccion discografico.
E disco ta reuni 17 cantica cu ta combina e talento di compositornan renombra manera Wilfran Castillo, Fabián Corrales, Reinaldo “Chuto” Díaz y Rosendo Romero, hunto cu figuranan hoben y autornan nobo. Como carta di presentacion a scoge e single “Dos inviernos”, skirbi pa Wilfran Castillo, cual ta sigui e prome adelanto “Si tú estás aquí”.
Bao di direccion di e miembro fundador y acordeonero Israel Romero, “El Pollo Irra”, su yiu Israel David Romero ta fungi awor como e bos lider principal di e agrupacion, compaña pa e acordeon di Samir Vence Romero. E grupo tin programa un gira internacional pa Europa, Latino America y Merca.
0 Comments