Emmys 2026: Triunfo Historico pa Widow’s Bay y Gran Reconocemento pa Matthew Rhys

E di 78 edicion di e Primetime Emmy Awards a bira un anochi historico na Los Angeles, unda e produccion nobo di Apple TV, titula Widow’s Bay, a conkista e categoria di miho comedia y a bay cas cu un total di seis premio. E gran strea di e anochi tabata Matthew Rhys, kende a haci historia door di bira e prome persona pa gana dos categoria di miho actor principal den e mesun aña, danki na su papel den Widow’s Bay y den e miniserie di Netflix The Beast in Me. Ademas, Jean Smart a sigui haci historia logrando su di cinco premio consecutivo pa su papel den Hacks. Di otro banda, e drama medico The Pitt di HBO Max a ripiti su exito ganando miho serie dramatico y premiando Noah Wyle como miho actor di drama, mientras e serie Pluribus y e comedia scur DTF St. Louis tambe a resalta.

Banda di e premionan entrega, e anochi tabata yen di momento sumamente emotivo dedica na figuranan grandi di entretenimento cu a fayece recientemente. Un momento special tabata e tributo dedica na e legendario Dolly Parton, unda e actriz Sally Field a duna palabranan conmovedor di cariño prome cu Reba McEntire a subi e escenario pa interpreta e cancion “Appalachian Memories”. Igualmente, Macaulay Culkin hunto cu Annie Murphy y Dan Levy a recorda e comediante Catherine O’Hara cu gran aprecio, compartiendo memorianan unico prome cu e segmento In Memoriam, unda Noah Kahan a canta “Bridge over Troubled Water”. Despues, Jamie Lee Curtis a rindi homenahe na e difunto director James Burrows y na Rob Reiner, kende a gana un premio postumo despues di un record di 47 aña for di su ultimo premio. Ademas, Michael J. Fox a ricibi e prestigioso Bob Hope Humanitarian Award pa su trabou grandi.

E ceremonia a destaca tambe pa mensahenan fuerte y conmovedor di varios creador y presentador riba scenario prome cu e anochi a conclui. Vince Gilligan a probecha su victoria cu e drama di ciencia ficcion Pluribus pa reflexiona riba e polarisacion den sociedad moderno, haciendo un yamada na respet y compasion mutuo. Stephen Colbert tambe a biba un momento di gran emocion ora The Late Show with Stephen Colbert a gana e premio pa miho serie di variedad, apenas algun luna despues cu e programa a yega na su fin oficial despues di diesun aña na television. Colbert a gradici profundamente su ekipo di trabou y a elogia nan talento extraordinario, pidiendo e industria pa sigui duna nan oportunidad laboral. Finalmente, e presentadornan Woody Harrelson y Matthew McConaughey a sera e anochi cu nan humor caracteristico prome cu host Mariska Hargitay a conclui e transmision exitoso.

____________________________________________________________________________

Artistanan Ta Bandona Gira di Ed Sheeran den Solidaridad cu Macklemore

Cuater musico renombra a dicidi di bandona e gira mundial di Ed Sheeran, despues cu e promotor a kita e rapper Macklemore for di e lista di telonero pa su expresionnan pro-Palestina durante conciertonan na New Jersey.

E artistanan cu a retira ta:

• Finneas (productor y ruman di Billie Eilish)
• Lukas Graham (cantante danes)
• Aaron Rowe (cantante irlandes)
• Beoga (banda tradicional irlandes)

Ed Sheeran a clarifica via Instagram cu e decision no tabata di dje, sino di e compania promotor Messina Touring Group, despues cu varios stadion a menasa di cancela e conciertonan. Robert Kraft, doño di Gillette Stadium, a declara cu nan no ta duna luga pa discurso di odio. Di nan banda, e artistanan a condena cualkier intento di censura, expresando nan sosten habri na e pueblo palestino y defendiendo e derecho di halsa nan bos contra inhusticia.

____________________________________________________________________________

Shakira Ta Yega Madrid pa Cera su Gira Historico cu Residencia Grandi

E cantante Colombiano Shakira a yega Madrid pa cuminsa e ultimo etapa di su gira mundial exitoso, Las Mujeres Ya No Lloran World Tour. Despues di a kibra recordnan impresionante rond mundo—manera 400.000 bishitante na Zócalo di Ciudad de Mexico y mas di dos miyon hende na Copacabana—e artista lo conclui su trayecto cu un residencia exclusivo den e capital spaño.

Shakira lo presenta un total di diesdos concierto parti entre september y october. Pa e celebracion aki, a lanta un stadion specialmente construi den e tereno di Iberdrola Music, diseña pa ricibi rond di 50.000 fanatico pa cada presentacion. Cu hopi entusiasmo, Shakira a expresa su deseo di uni comunidad Latino mediante musica, baile y emocion humano den e era digital.

____________________________________________________________________________

Oasis Ta Anuncia Gira Mundial di 38 Concierto pa 2027

E legendario banda di rock Britanico Oasis a confirma nan proximo gira internacional, Oasis Live ’27. Despues di nan exitoso regreso na 2025 cu a keda registra den e documental Oasis: Don’t Look Back In Anger, e rumannan Gallagher lo presenta 38 concierto na 11 ciudad rond di 9 pais.

E gira lo cuminsa dia 21 di mei 2027 na Celtic Park na Glasgow y lo finalisa dia 19 di september na Knebworth, caminda nan lo duna cuater concierto historico. Tambe e programa ta inclui un residencia di 11 concierto na Manchester y presentacionnan na ciudadnan grandi manera Amsterdam, Paris, Roma, Boston y Las Vegas

Pa evita rebenta y prijs dinamico, e entradanan standard lo tin tarifa fiho entre 85 € y 255 €. Fanaticonan mester registra via nan website prome cu diahuebs 17 pa haya chens di cumpra ticket.

____________________________________________________________________________

Maroon 5 y Demi Lovato Ta Encabesa Penultimo Dia di Rock in Rio

Cerca di 100.000 persona a yena e di seis y penultimo anochi di Rock in Rio na Brasil, unda ritmonan contagioso di pop y reggaeton a conkista e multitud. E banda Estadounidense Maroon 5, lidera pa Adam Levine, a pone henter e audiencia canta cu exitonan grandi manera “Moves like Jagger”, “Animals” y “This Love”. Prome cu nan, Demi Lovato a presenta un show dinamico pa promove su album It’s not that deep, deleitando e fanaticonan cu temanan manera “Heart Attack”, “Confident”, y cerando su show hunto cu e cantante Pabllo Vittar riba e cancion “Cool for the Summer”.

E ambiente festivo a sigui cu e Colombiano J Balvin, kende a domina cu su ritmo urbano cantando “Mi gente” y “Perversa” hunto cu e artista Brasileño Pedro Sampaio. E banda Mumford & Sons tambe a luci cu “I Will Wait”, mientras e hoben rapero Argentino Milo J a bira e gran sorpresa di e festival despues di a yena e escenario secundario Supernova completamente.

____________________________________________________________________________

Céline Dion Ta Conmove Paris cu su Regreso Triunfal Despues di Seis Aña

Despues di seis aña leu for di escenario debi na su lucha contra e malesa neurologico “Stiff Person Syndrome”, Céline Dion a haci un regreso sumamente emotivo na Paris. Dilanti di 35.000 fanatico den Plenitude Arena, e strea Canades a cuminsa su concierto cu lagrima di alegria cantando “On ne change pas”, demostrando cu el a siña transforma su fragilidad den forsa vital.

Bistí elegantemente pa Christian Dior, Dion a canta varios di su exitonan inolvidabel manera “I’m alive”, “Power of love”, “Love Can Move Mountains”, “The Prayer” y e legendario “My Heart will go on”. Entre e publico tabatin personalidatnan conoci manera Michelle Obama.

E concierto aki ta e prome di un residencia exclusivo di 26 show na e capital Frances, partí entre september y october di 2026, cu dies fecha adicional programa pa mei 2027. E fenomeno aki, conoci como “Dionmanía”, ta genera un impacto economico grandi calcula entre 500 y 1.000 miyon euro pa henter e region.

____________________________________________________________________________

Coleccion Nobo di Spice Girls Ta Causa Desapunto Entre Fanatico

E famoso grupo Britanico Spice Girls a genera un ola di desapunto entre su siguidonan despues di a revela cu nan celebracion pa e di 30 aniversario lo consisti solamente di cahanan coleccionabel di CD y vinyl. Hopi fanatico tabata spera un reunion riba escenario cu e integrantenan Mel B, Mel C, Emma Bunton, Geri Halliwell y Victoria Beckham, specialmente despues di un video misterioso riba rednan social cu e cancion “Wannabe”.

E coleccionnan, cu lo sali oficial riba mercado dia 6 di november proximo pa conmemora tres decada di e album Spice, lo inclui grabacionnan inedito manera “Do You Think About Me”, canticanan “b-side” y un buki cu mensahenan exclusivo. E prijsnan ta varia entre 110 y 323 euro.

A pesar cu e quinteto a bende mas di 100 miyon copia mundialmente, fanaticonan a critica e lansamento fuertemente riba rednan social, expresando cu nan kier un gira mundial y no mercancia promocional caro.

____________________________________________________________________________