Ariana Grande Ta Despedi Entre Lagrima di Escenario pa Proteha Su Paz

E cantante Mericano Ariana Grande a baha for di escenario entre lagrima na O2 Arena na London, anunciando un retiro temporal pa aleha di e constante presion y scrutinio publico.

Cu e concierto aki, completamente bendi y dilanti di 20.000 fanatico, Grande a cera su exitoso gira mundial Eternal Sunshine di 41 presentacion. Visibelmente conmovi y cu bos kibra, e artista a gradici su publico pa duna e “un di e experiencianan mas bunita” di su bida.

Apesar di speculacionnan constante rond di su salud debi na su figura delega, Grande a brinda un presentacion impecabel y dinamico hunto cu su bailadornan. Un di e momentonan mas emotivo tabata ora el a pidi yudansa di e publico pa canta One Last Time, cancion emblematico dedica na e victimanan di e atentado na Manchester na 2017. Awo, e strea internacional ta tuma un pausa necesario pa recupera su trankilidad leu di luznan di fama.

____________________________________________________________________________

Premios Juventud Ta Conkista Europa: Shakira, Bad Bunny y Karol G Ta Bria na Marbella

Pa prome biaha den historia, e gala di Premios Juventud a crusa Atlantico pa celebra musica y cultura Latino na Marbella, Spaña. E anochi tabata domina pa gran nombernan: Shakira a bay cas cu tres premio—incluyendo miho artista femenino y miho cancion pop pa Bésame hunto cu Alejandro Sanz—mientras Bad Bunny a triunfa como miho artista masculino y miho gira cu Debí tirar más fotos world tour.

Karol G a conkista Álbum del Año cu Tropicoqueta, mientras Aitana, Alejandro Fernández, Prince Royce y Romeo Santos tambe a bria den varios categoria. Figura manera Antonio Banderas, Marc Anthony, Yandel y La Oreja de Van Gogh a ricibi e distincion special di Agentes de Cambio.

Cu presentacionnan electrisante di Camilo, Wisin y Elena Rose, e gala transmiti pa mas di 150 pais a marca un antes y despues pa musica Latino na Europa.

____________________________________________________________________________

Oscar De León Lo Ricibi e Prestigioso ‘Premio Leyenda’ na Merca

E legendario salsero Venezolano Oscar D’León lo ser honra cu e distincion maximo Premio Leyenda durante e di 39 edicion di e Premios a la Herencia Hispana. E reconocemento aki ta rindi homenahe na su carera di mas di 50 aña y su aporte inmenso na musica afrocaribeño y cultura internacional.

Conoci mundialmente como “El Sonero del Mundo”, e interprete di clasiconan inolvidabel manera Llorarás y Detalles a traspasa frontera y generacion. Cu e galardon aki, De León ta drenta un circulo exclusivo di baluartenan Latino cu a yega di ricibi e honor aki, entre nan Celia Cruz, Tito Puente y Juan Luis Guerra.

E ceremonia oficial lo tuma luga dia 10 di september na Orchestra Hall na Minneapolis. E premionan aki, crea pa Cas Blanco na 1988 pa conmemora e Mes de la Herencia Hispana, ta celebra e figuranan di mas influyente den e comunidad hispano.

____________________________________________________________________________

Bad Bunny Ta Gana Su Prome Emmy pa e Show di Super Bowl

E strea Puertorriqueño Bad Bunny a haci historia atrobe dor di gana su prome premio Emmy durante e gala di Creative Arts Emmys na Los Ángeles. Su presentacion espectacular, The Apple Music Super Bowl LX Halftime Show Starring Bad Bunny, a conkista un total di shete galardon for di nuebe nominacion, convirtiendo e show den un di esnan mas premia den historia di television.

Entre e categorianan gana ta destaca direccion musical, coreografia, diseño di iluminacion y direccion tecnico. Den e concierto memorabel aki—unda el a comparti escenario cu artistanan manera Lady Gaga cantando Die With A Smile na salsa y Ricky Martin cu Lo Que Le Pasó a Hawái—Bad Bunny a hiba un mensahe poderoso di union continental bou di e lema Together we’re America. E gala oficial transmiti pa television lo tuma luga dia 14 di september.

____________________________________________________________________________

Cine Mundial Ta Uni Forsa pa Peliger di Inteligencia Artificial

Lidernan di e industria cinematografico mundial a reuni na Saint-Paul-de-Vence, Francia, durante e prome Foro Lumière pa defende e septimo arte contra e menasa di inteligencia artificial (IA) generativo y e crisis di benta di carchi den sala di cine, cual a baha cu 40% mundialmente desde e pandemia.

E cumbre, cu a conta cu 220 participante for di 65 pais, a keda inaugura pa e presidente Frances Emmanuel Macron y su homologo Surcoreano Lee Jae-myung. Macron a spierta contra e riesgo cu tecnologia por reemplasa e creadornan humano.

Entre e acuerdonan principal ta destaca creacion di Iris, un fondo di 30 miyon euro pa sostene cine independiente, respala pa cineastanan renombre manera Pedro Almodóvar y Sofia Coppola, banda di sosten di Martin Scorsese y George Clooney. Notabelmente, e companianan grandi di IA y YouTube tabata ausente di e encuentro historico aki.

____________________________________________________________________________

Rob Reiner Ta Gana Premio Emmy Postumo pa Su Rol den ‘The Bear’

Nuebe luna despues di su fayecimento tragico, e legendario director y actor Rob Reiner a keda honra cu un premio Emmy postumo pa su actuacion den e serie dramatico The Bear.

E reconocemento den e categoria di outstanding guest actor in a comedy a wordo anuncia diadomingo anochi durante e ceremonia di Creative Arts Emmys na Peacock Theater na Los Ángeles, provocando un aplauso largo di parti di su coleganan. Reiner, kende a dirigi clasiconan manera When Harry Met Sally y The Princess Bride, a interpreta un consultor di negoshi bondadoso den e di cuater temporada di e serie.

E victoria aki ta marca su prome Emmy den 48 aña, despues di a gana dos biaha den decada di 1970 pa All in the Family. Ademas, Reiner ta bira e prome actor cu ta gana un Emmy postumo desde Raúl Juliá na 1995.

____________________________________________________________________________

Spice Girls Ta Lanta Rumor di un Posibel Regreso cu Video Misterioso

E legendario grupo Britanico di pop Spice Girls a lanta speculacionnan grandi rond di un posibel regreso na escenario of lansamento di musica nobo, tras di a publica un video enigmatico riba nan rednan social oficial.

E video ta graba riba e trapinan di e mesun hotel unda nan a filma e videoclip historico di Wannabe na 1996, celebrando 30 aña e aña aki. Den e clip ta aparece un corant cu un mensahe pidiendo fanatico pa ta pendiente pa un anuncio programa pa diahuebs 10 di september, indicando cu lo rekeri un reproductor di vinyl of CD.

Seguidornan tambe a descubri codigonan numerico cu por sugeri un fecha adicional pa dia 6 di november. E banda—consagra pa exitonan manera Viva Forever—no a presenta cu su alineacion completo desde e ceremonia di clausura di London 2012.

____________________________________________________________________________

‘Ciudad Shakira’ na Madrid: Conoce e Artistanan Cu Lo Forma Parti di e Experiencia

Shakira a anuncia e prome artistanan cu lo presenta den e espacio cultural Es Latina, parti di e impresionante Macondo Park diseña pa su residencia historico na Madrid for di 18 di september te 11 di october, cu lo cera su gira mundial Las mujeres ya no lloran.

Entre e figuranan confirma ta destaca Nathy Peluso, Guitarricadelafuente, Amaia, Gale, Aria Vega y Lia Kali, formando un combinacion di talento consolida y proyectonan nobo cu enfoke riba liderazgo femenino. E show aki ta pafo di e stadion, apart di e artistanan sorpresa cu lo subi escenario principal cada anochi hunto cu Shakira.

E experiencia cultural lo inclui tambe literatura iberoamericano den La Biblioteca, gastronomia di chef internacional den El Mercado, y un carnaval nocturno na Macondo Plaza.

____________________________________________________________________________

Lisa di BLACKPINK Ta Lansa Su Prome Documental: ‘Always Lalisa’

Lisa, integrante di e famoso grupo di K-pop BLACKPINK, lo estrena su prome pelicula documental titula Always Lalisa, cual lo yega na salanan di cine y IMAX rond mundo a dia 12 di october prome cu e pasa exclusivamente pa YouTube Premium na final di 2026.

E produccion, dirigi pa Sue Kim, ta cana tras di un aña decisivo den bida di e artista Tailandes, caminda el a tuma un pausa for di e grupo pa enfoca riba su carera como solista, su debut como actriz den e di tres temporada di The White Lotus, y creacion di su propio marca. E trailer oficial ta mustra su esfuerso fisico tras di escenario y con el a redefini su mes como strea global.

Banda di esaki, Lisa a lansa e cancion SaWaDiKa, prome adelanto di su EP Press Play, filmando su videoclip na Bangkok.