Brad Pitt ta revela e costo di a interpreta Aquiles den e pelicula ‘Troya’

Interpreta e guerero mitigo griego Aquiles den e pelicula Troya (2004) tabata un di e puestonan mas conoci di Brad Pitt, pero tambe un di e mas exigentenan di su carera.

Pa logra e aspecto fisico di e guerero, Pitt a pasa mas cu un aña bao un regimen di entrenamento rigoroso y dieta estricto dirigi pa un ex-Navy Seal. E actor a stop di huma y a entrena intensamente su lomba y brasa pa haci transformacion di su curpa. E presion tabata asina hopi cu, net ora e filmacion a termina, e prome cos cu el a haci tabata come un hamburger y bolbe huma.

Ademas di e desgaste fisico, Pitt a sinti frustracion artistico. El a acepta e papel pa motibo di compromiso contractual y a sinti cu e pelicula a perde misterio door di enfoca riba formulanan comercial. E experiencia aki a bira un punto di inflexion: for di e momento ey, Brad Pitt a dicidi di no acepta mas proyecto puramente pa obligacion comercial.

____________________________________________________________________________

Romeo Santos ta crea e ‘Fundación Los Santos’ pa apoya muchanan cu autismo

E cantante di origen dominicano Romeo Santos, conoci como e Rey di e Bachata, a anuncia e creacion di e Fundación Los Santos, un iniciativa diseña pa apoya muchanan cu autismo y nan famianan. E organisacion aki ta nace for di su experiencia personal como tata di un mucha cu e condicion aki.

E fundacion lo brinda recurso, programa educativo, desaroyo social y subsidionan, creando aliansa cu scolnan y organisacionnan comunitario pa mehora e acceso na servicionan di apoyo. Santos a expresa cu e proyecto aki ta profundamente personal y cu pa añanan e tabatin e intencion di yuda crea mas comprension social tocante e autismo.

Segun datonan di e Centronan pa Control y Prevencion di Enfermedad (CDC) di Merca, rond di 1 di cada 31 mucha di 8 aña ta wordo identifica cu autismo, locual ta resalta e necesidad urgente di mas recurso pa e famianan.

____________________________________________________________________________

Rosalía ta hari tocante relacion habri den su concierto na Río de Janeiro

Durante su prome concierto na e Farmasi Arena di Río de Janeiro, e cantante spaño Rosalía a protagonisa un momento pret hunto cu e artista brasilero Marina Sena den e seccion di “confesionario” di e show.

Sena a confesa cu, ora el a habri su relacion riba peticion di su pareha, el a yega di tin te hasta un pareha diferente tur siman. Entre hari, Rosalía a responde maliciosamente cu un comentario cu a conmove e publico: “Piden fuego y después no aguantan el calor” (“Nan ta pidi candela y despues nan no por wanta e calor”).

E intercambio aki tabata un di e momentonan mas ‘hot’ di e anochi, caminda e cantante catalana a conecta debidamente cu su fanaticonan brasilero den un intercambio den’portuñol’. Despues di su show na Brasil, Rosalía lo continua su gira pa Mexico y Puerto Rico, caminda e lo finalisa su tour e luna aki.

____________________________________________________________________________

Rod Stewart ta anula concierto pa motibo di operacion di curason

E cantante britanico Rod Stewart, di 81 aña di edad, mester a anula varios concierto di su gira na Nort America despues di a somete su mes na un operacion di curason.

Segun un comunicado publica riba su cuenta di Instagram, Stewart a ricibi un intervencion exitoso caminda a coloca un stent coronario. Pa conseho di su doctornan, e artista mester tuma por lo menos cuater siman pa recupera, locual ta impedi cu e por continua cu su presentacionnan programa na Merca, incluyendo seis fecha na Las Vegas, y show posterior na Mexico.

E interprete di exitonan inolvidabel manera “Maggie May” y “Da Ya Think I’m Sexy?” ya tabatin cu anula algun fecha na mei y juni pa motibonan di salud. E artista legendario mester tuma e descanso aki obligatorio prome cu e por reflexiona riba un posibel regreso na escenario.

____________________________________________________________________________

Concierto benefico na Miami lo extende ayuda pa victimanan di e teremoto na Colombia

E concierto benefico cu tabata plania na Miami pa recauda fondo pa e victimanan di e teremotonan na Venezuela, awor lo bay apoya tambe e personanan afecta pa e teremoto di magnitud 7.4 cu a sacudi Colombia.

E evento, cu lo tuma luga na Kaseya Center di Miami, a cambia su nomber di “Unidos por Venezuela” pa “Unidos por los Nuestros”. E iniciativa lo conta cu e participacion di artistanan renombra manera Marc Anthony, Chayanne, Feid, Ricardo Montaner, Olga Tañón, Silvestre Dangond y Elena Rose, entre otronan.

E fondonan cu wordo recauda lo bay pa financia programanan di alimentacion, atencion medico, refugio temporal, salud mental y reconsruccion den ambos pais. Florida ta e cas di e diaspora mas grandi di tanto venezolano como colombiano na Merca, locual ta uni e comunidad hispano den e esfuerso humanitario aki.

____________________________________________________________________________

Mattel ta lansa popchi di Barbie den tributo na Whitney Houston

Den cuadro di locual lo tabata e di 63 cumpleaños di Whitney Houston riba 9 di Augustus y 14 aña di su fayecimiento, e compania Mattel a anuncia e lansamento oficial di un popchi di coleccion na su honor.

E popchi aki, parti di e liña estilo Barbie, ta rindi homenahe na e cantante iconico den un di e momentonan mas briyante di su carera. E figura ta bisti cu un bisti violeta y e estilo di peinado y accesorio caracteristico cu el a uza den e video musical di e cancion famoso “I Wanna Dance with Somebody (Who Loves Me)” lansa na 1987.

E diseño di e popchi a keda aproba pa Pat Houston, su cuña y presidenta di e patrimonio cu ta administra e derechonan di e artista. Cu e lansamento aki, Mattel ta sigui rindi tributo na figuranan femenino di e cultura popular, uniendo na edicionnan anterior dedica na artistanan manera Tina Turner y Gloria Estefan. E popchi ya ta disponibel mundialmente.

___________________________________________________________________________

BTS ta conkista Merca den nan regreso cu e ‘Arirang World Tour’

E grupo surcoreano BTS a revoluciona e ciudad di Baltimore durante e prome di dos concierto den e region di e capital di Merca, como parti di e di dos tramo di nan gira mundial “Arirang World Tour”.

Mas di 70.000 fanatico a yena e stadion M&T Bank totalmente, caminda e grupo di K-pop a brinda un show impactante. Apesar cu e pantayanan gigante a haya un faya tecnico na inicio, e entusiasmo di e sigidornan (ARMY) no a disminui. BTS a habri e concierto cu e cancion “Hooligan” y a interpreta exito di nan album nobo Arirang, combina cu clasiconan inolvidabel manera “Dynamite”, “Butter” y “Fake Love”.

E gira mundial aki—cual ta e mas grandi di e grupo te cu awo—lo continua pa varios ciudad di Merca, sigui pa Latino America den luna di October y lo finalisa na Asia na 2027.

____________________________________________________________________________

Karol G ta canta na e desamor den su album nobo ‘No me arrepiento de sentir tanto’

E cantante colombiana Karol G a lansa su di seis album di studio titula “No me arrepiento de sentir tanto”, e trabou mas intimo y vulnerabel di su carera. Cu 14 cancion, e artista di 35 aña ta expresa e rabia y e dolor di e desamor, marcando su regreso na e genero urbano.

E album nobo aki ta bin despues di su exito “Tropicoqueta” y ta refleha e proceso emocional despues di e fin di su relacion di cuater aña cu e cantante Feid. E discografia ta inclui colaboracionnan internacional destaca, entre nan e cancion na ingles “Still” cu Bruno Mars, e tema “Ahí” hunto cu e canadiense Drake, y participacion di e artistanan spaño Judeline y Rusowsky den “BbY WOW”.

Karol G ta spera cu su sigidornan por conecta debidamente cu e emocionnan mas profundo di e proyecto aki.

___________________________________________________________________________

Pitbull ta anuncia lansamento di su album nobo ‘Pitcoin’ pa luna di October

E cantante mericano di origen cubano Pitbull a anuncia e lansamento di su proximo discografia titula “Pitcoin”, e di 14 album di studio den su carera, cual lo ta disponibel desde 8 di October.

E anuncio aki ta bin mientras e artista ta meymey di su gira “I’m Back Tour”, cu a recore Merca, Europa y Canada. Durante su paso pa e Hyde Park na London, Pitbull a kibra un record Guinness door di reuni mas di 22.000 persona cu peluca pa simula calvicia den su honor.

Maske e artista no a duna mas detayes di e material nobo, e lansamento di “Pitcoin” lo tuma luga dos siman prome cu e Billboard Latin Music Week 2026 na Miami, evento caminda e mes lo participa hunto cu otronan artista di musica na spaño. E album aki ta marca su regreso tres aña despues di su ultimo disco Trackhouse lansa na 2023.