Ora e noticia a sali cu un piscado Colombiano a muri den un atake militar Mericano riba lama, e storia tabata parce cla: un otro bida inocente perdi den e guera contra droga. Presidente Gustavo Petro a condena e accion como un violacion di e soberania di Colombia, bisando cu e homber tabata drif y desampara. Su nomber tabata Alejandro Andrés Carranza Medina — un homber di 40 aña di Santa Marta, conoci pa su famia como un piscado keto cu tabata purba di mantene su cas.
Pero mientras cu e titularnan internacional tabata aumenta y e consecuencianan diplomatico tabata bira mas profundo, un otro version di e storia di Carranza a cuminsa sali na superficie — uno haya den archivonan hudicial, no den anecdotanan personal.
Segun registronan publico di corte, Carranza a wordo aresta na 2016 como parti di un di e casonan di corupcion policial interno di mas grandi den historia recien di Colombia. Identifica pa autoridadnan cu e apodo ‘Coroncoro’, e la wordo deteni hunto cu cinco oficial di polis pa e supuesto hortamento di mas cu 230 arma di candela for di e deposito di arma di e Policía Metropolitana de Santa Marta.
Fiscalnan ta bisa cu gran parti di e arsenal ey a wordo bendi na e grupo criminal Los Pachenca, un gang violento estilo paramilitar cu ta opera na e costa nort di Colombia. Carranza, e unico civil den e caso, supuestamente a acepta cargonan incluyendo conspiracion, hortamento agrava, falsificacion di documento, y malversacion. Documentonan a revela cu dozenas di autorisacion pa saca arma a wordo falsifica — algun hasta tabata tin e firma falsifica di un fiscal.
Pues, ken e tabata — un piscado simpel of un homber cu lasonan cu crimen organisa?
Den su comunidad, e contesta ta sinti mas cla. Bisiñanan y famianan ta describi un homber humilde cu tabata lanta prome cu solo sali pa pisca y tabata bin cas keto anochi. “E no tabata envolvi den nada straño,” un famia a bisa. “E tabata pisca. Esey ta loke e tabata haci.”
Pero pa e autoridadnan Colombiano y Mericano, e berdad ta mas scur. E boto cu Carranza tabata abordo a wordo ataca como parti di un operacion Mericano contra supuesto traficantenan di droga. Segun oficialnan Colombiano, e boto tabata daña y drif — no huyendo of atacando. Desde e tempo ey, Presidente Petro a yama e atake un “asesinato”, lantando preguntanan nobo tocante actividad militar Mericano den Caribe y nan coordinacion cu gobiernonan local.
E caso awor ta un punto central den e batayanan interno y externo continuo di Colombia: entre transparencia y secreto, soberania y cooperacion stranhero, historia y redencion.
Ta posibel cu ambos storia ta berdad? Cu Carranza un dia tabata implica den crimen, a sinta su tempo (di castigo), y despues a bolbe na un bida modesto riba lama? Of cu su pasado — real of exagera — tabata suficiente pa hustifica un atake fatal for di shelo?
Kisas e berdad completo lo no yega di wordo conoci nunca. Pero e morto di Carranza awor ta para den centro di un tormenta creciente: tocante ken ta haya e stempel di criminal, con evidencia ta wordo uza den asesinatonan dirigi, y ki proteccion ciudadanonan ordinario tin den e neblina di guera moderno.
Pa su famia, e ta keda un piscado. Pa gobierno, kisas un storia di advertencia. Pa e region, un recordatorio cu e guera contra droga hopi biaha ta laga su marca riba mas cu djis su obhetivonan intencional — e ta laga comunidadnan gara den e marea.






0 Comments