Calidad y Contenido Propio Prome: 

Guianan Nobo pa Contribucionnan Politico

Cu e fluho creciente di comunicacionnan politico, AWEMainta ta sinti e responsabilidad pa establece limitenan cla. No pa suprimi bosnan, sino pa cuida e calidad di nos producto redaccional y proteha e debate contra contaminacion pa medio di ripiticion, atakenan personal of slogannan bashi. Como corant nos no kier ta simplemente un canal pa pasa mensahenan politico, sino un fuente confiabel di contenido periodistico cu ta contribui na e combersacion publico.

Nos prioridad ta na nos propio contenido independiente. Nos redactor ta inverti diariamente den storianan bon fundamenta, reportahenan local y analisis. Nos no kier pa e espacio valioso aki bin bou presion pa un exceso di articulonan presenta cu hopi biaha tin poco balor di noticia. P’esey, for di awor lo tin un maneho cu ta trece structura den e manera cu partidonan politico, fraccionnan y politiconan individual por manda nan contribucion.

Reglanan Pa Contribucionnan Politico

Prome, mensahenan for di canalnan oficial di gobierno por wordo manda via nan adres di email usual. Mientras cu e comunicacionnan aki no ta repiti su mes y ta keda informativo, nos lo sigui publicanan bou di e seccion “Comunidad.” Pero aki tambe ta conta: ripiticion y superficialidad ta laga luga pa relevancia y balor di noticia.

Pa fraccionnan politico y politiconan individual ta conta condicionnan mas stricto. AWEMainta lo NO publica mensahenan cu ta enfoca riba atakenan personal of destruccion di caracter. Haci pregunta critico, cuestiona maneho of splica diferencianan di vision ta parti di e wega politico. Pero ora textonan ta enfoca riba kibra en bes di construi, nan no ta pas den nos balornan.

Ademas, nos kier limita e cantidad di contribucion pa topico pa partido na dos. Esey ta nifica cu un partido por publica maximo dos biaha riba e mesun tema dentro di un periodo di tempo rasonabel. Di e forma ey nos ta tene espacio pa bosnan diverso, sin cu nos lesadonan wordo abruma pa contenido repetitivo for di e mesun fuente.

Nos corant ta scoge conscientemente pa pone espacio liber disponibel pa contribucionnan politico — esey ta nos contribucion na democracia y libertad di expresion. Pero esey ta bin ta nifica cu nos no tin e capacidad pa re-skirbi textonan of coregi foutnan di idioma. P’esey nos ta pidi urgentemente pa entrega e contribucionnan den Papiamento of Hulandes corecto, den un tono y estilo cu ta pas cu e calidad periodistico cu nos ta aspira.

Den caso di duda tocante publicacion, of den caso di peticionnan excepcional, partidonan por semper contact nos prome. Nos ta kere den comunicacion habri, pero semper ta mantene e derecho pa edita of nenga loke no ta pas cu nos balornan redaccional.

Finalmente: nos clientenan — esnan cu ta haci publicidad y ta traha regularmente cu nos — ta ricibi logicamente prioridad den visibilidad. Nos ta un corant, pero tambe un empresa, y nos ta busca balansa entre interesnan comercial y responsabilidad social.

En corto, AWEMainta ta habri pa comunicacion politico, pero no na costo di nos integridad redaccional. Nos ta pidi respet, contenido y responsabilidad — exactamente loke nos tambe ta spera di e hendenan cu kier lidera e pais aki.