Laga nos stop di pretende cu nos no sa. Tin biaha e persona di mas peligroso rond di un mucha no ta un desconoci riba caya; ta e omo cu tur hende ta spanta nan yiunan p’e, e maestro cu su comportacion ta haci e studiantenan incomodo, e coach cu e mayornan ta bisa nan yiunan den silencio pa keda leu for di dje, of e amigo di famia cu ningun hende kier laga nan yiu su so cun’e.

Y e parti di mas doloroso? Tur hende sa.

Kisas no tin suficiente prueba pa hiba un caso den corte of haci un denuncia formal mesora, pero si tin suficiente motibo pa haci hende sinti nan mes incomodo, pa mayornan papia na bos abou, y pa adverti e muchanan: “Djis no keda bo so cun’e.”

Y toch, ningun hende no ta haci nada. Pakico?

• Pasobra confronta e persona ta trece problema y berguensa;
• Pasobra e ta famia di sanger;
• Pasobra e maestro tin binti aña na e scol;
• Pasobra e coach ta gana campeonato pa e club;
• Pasobra e persona tin bon conexion;
• Pasobra ningun mayor kier ta esun cu a “busca problema”;
• Pasobra proteha reputacion hopi biaha ta parce mas facil cu proteha un menor di edad.

Esey ta e berdad amargo cu nos no gusta papia di dje. Nos ta bisa nos muchanan: “Papia si bo sinti cu algo no ta bon,” pero nos ta rondona nan cu adultonan cu ta bisa: “Corda bo no tira culpa riba hende.” Nos ta bisa nan: “Bo por conta mi tur cos,” pero ora e mucha finalmente tribi di expresa su mes, e prome reaccion di e adulto ta: “Bo ta sigur?”

Claro cu hechonan ta importante y acusacionnan infunda por haci daño. Pero tin un abismo grandi entre busca berdad y uza falta di prueba directo como un excuus comodo pa no actua. Un preocupacion serio merece atencion, un patronchi di comportacion straño merece investigacion, y e miedo di un mucha semper merece atencion mesora. Un persona cu ta pasa e limte repetidamente no por haya proteccion ciego djis pasobra e ta popular of exitoso.

Un famia por sobrevivi un berguensa; un scol por sobrevivi un investigacion disciplinario; un team deportivo por sobrevivi si e perde un coach; pero loke un mucha kisas nunca por supera ta e les traumatico cu ningun hende no a kere den dje ora el a pidi ayudo.

Ora un hende lanta bos, hopi biaha e denunciante ta bira e problema: “E ta exagerando,” “E ta jaloers,” of “Pensa riba e famia.” Di e forma ey, e combersacion ta aleha for di e señalnan di alerta y ta bira un intento desespera pa salba e imagen di e agresor. Esey no ta proteccion; esey ta cobardia.

Ningun hende no tin derecho riba confiansa ciego simplemente pa motibo di titulo, carera of sanger. Pasobra e fayo di mas grandi nunca ta cu ningun hende no tabata sa; e tragedia berdadero ta cu tur hende tabata sa suficiente pa ta preocupa y toch a scoge pa keda keto.